11-10-2009 Oles

OLES

Xornada gastronomica-cultural. ¡Ya yera hora! ¡Y ensin madrugar!

Salimos a les 10.30 de Xixón, tras aparcar los coches y dexar la comida a buen recaudu entamamos con poques ganes a caleyar. Averamonos al faru de Tazones, los güajes cansen d'esperar, cuando llegamos expliquennos pa que son los faros, probe fareru tola nueche cola llinterna na mano.

Volvemos sobre nuesos pasos, un paisanin non sal de so asombru ¿pa onde vamos? nun ye por ahi, ta embarrao, vase meyor pola carretera, queaxe rascando la tiesta, nun entiende na, el mundu ta perdíu, la xente folga, refalfía, ensin solución, ¡esti Zapatero!

Pese a tolos razonamientos del paisanu, tos perbonos, seguimos con nuesos planes, el camín humedú y resbaliosu discurre a la solombra los ocalitos rodiau d'ortigues y otra prestosa flora.

Baxamos y subimos averaos a los cantiles, el mar azul oscuru, llanu como un platu soperu, el cielu d'añil ensin ñube dalguna, la temperaturatura más de 20 y menos de 25º, les tripes que comencipíen a ruxir, non diba tar to bien.

Salimos a la carretera, pasamos a la vera la ilesia, vamos de paseu pola estrecha carretera glayando de vez en cuando, cocheee.
Llegamos a un descampau con bancos y meses, tase bien a la solombra los ocalitos, un furacón adientrase nes entrañes la tierra, ye una mina d'azabache.

Tamos volviendo, la xente camina más apriesa, la fame acelera'l pasu, una bona idea pa futures rutes, dexar la comía nos coches, ay, ay, no. Non dixe na, equivoqueme... Ya lo dicía mio güela "cola comía non se xuega"

Ya caleyamos bastante, 10 km. y un desnivel de 200 m. como aperitivu ya basta.
Sacamos la mesa, enseguía ta llena. Damos bona cuenta deles viandes, agora vienen los postres, ¿onde tan los postres?... la sobremesa allargase, el Oviedo ta recibiendo un bañu del Sporting como casi siempre, non agora ye'l Sporting B el que los ta bailando, que ridiculu faen, val más colar.