LLOVIU-CUEVA DEL TINGANON-PEME-LLOVIU
Tras una llarga y escura nueche dexo a los compañeros desayunando en Xixón, dispuestos a baxar la persiana y dormir la mañana, yo voy meteme na escuridá duna cueva.
Enantes paramos a desayunar en Villaviciosa. Tras dexar los coches en Lloviu (20), debaxo'l puente l'autopista, calzamonos les botes y comencipíamos a caleyar, son les 10:15, fai sol anque la mañana entovía ta fresca.
Adentríamonos na biesca crucíando la riega, subimos a la vera'l ríu Lloviu, un ratín pola drecha otru ratín pola manzorga, pasamos a la vera les ruines dun molín, vamos siguiendo unes manguerones que lleven el agua nun se sabe pa onde.
Les piedres tan resbalioses, hay que char mano a onde se puea, yerbes, ablanos, castaños, hasta a dalguna cotolla, estes sueltense más apriesa y dexen recuerdos más duraderos.
La humedá y el calor faen que vayan cayendo goterones de sudor.Chamos mano a unes cuerdes que pa tal fin tan enganchaes na roca, y más esguilando que caleyando llegamos a la bocona la Cueva (160).
Son les 11:00 cuando colos frontales prendios metemonos nes tiniebles, de seguio entama a cayenos agua por tolos llaos. Alfonso da cola salía, una falsa meta, acababemos d'entrar per allí.
De nuevu p'adientro, faciendo semeyes y más semeyes, y cuidando onde posar les manes, a la vera una alletarga víebora pasamos güei, nun m'entrugeis el porque, tres veces, finó espertando y espurriendose de tanto venos pasar.
L'agua tresparente facíase notar cuando ya tabes nella metíu, non taba fría, pero si que moyaya, evitamosla lo más que pudimos agarrandonos con pies y manes a les piedres llises y perfeutamente pulies.
La cueva ca vez más estrecha y el agua ca vez más abondante... llego'l momentu de dar p'atrás, non dibemos equipaos, ni bien ni mal, non dibemos, si a la piedra seca yerá díficil agarrase cuando ya ta moyá casi meyor ni intentalo, asina dimos cola lluz.
Subimos pol pindiu pedregal hasta'l colláu del Altu la Cueva (350) pa baxar a la Jorvita a entruga-y a un pastor, animaos pol paisanu metimonos nel regueru con munches dificultaes y...coxones, fácil sería pero ensin cuerdes no matase resulta casi imposible.
Asina que salimos del regueru, esguilando pola fastera de la manzorga detrás d'Alfonso, paecía que-y había picao d'aque, atalayamonos nos Cuetos Medios (400) agarrandonos a les yerbes pa non cayer p'atrás y baxamos unos metros más p'alla agarraos a les cotolles.
De nuevo nel Colláu del Altu la Cueva, desta vegada sentamonos a xintar.Ya diba cuna bona moyaura, agora de sudor, coles manes alletargaes poles caricies de les cotolles.
Entamamos a baxar, paez imposible facelo ensin atase, primero polo pindio y a partir de la cueva polo resbalioso, les manes queden bien curtíes güei.L'últimu tramu ye un paseín, llegamos a los coches y camudamonos de ropa.
Aprovechamos una manguera sita na Cuadrona pa llavanos un poco mentanto discurrimos onde tomar una cerveza.Enantes de la cerveza ficimos durante 6 hores, 5 km y 590 m. de desnivel ensin lo de dientro de la Cueva, que non permitierón la entrá a los satelites.
