entrepicos

ENTREPICOS 5-6-2020 79.1/ 79.3

Tola selmana dando malo y equivocándose, pal vienres danlo bono, a ver si atinen, de momentu vamos tirar pal puertu braña, saliendo alto paez que los cumales son más baxos.

Asina apaecemos na raya (1520) a 3º y con brisina, eso si el cielu más llimpiu que la mio cocina, entamamos a mover les pates xusto a les 8.04, na más comencipiar y ya tenemos que saltar una allambrada, coyemos el camín, un poco embarrau en dirección a la braña la capiya.

Enantes d’algamar la braña  ya tiramos p’arriba, de campera en campera y algún tramu de piornal, a ver cuando, tendrán que ser los chinos, los qu’inventen una desbrozadora pa poner nos cuernos de les vaques, de momentu tendremos que siguir furando.

Vamos regatiando los piornales cuál el meyor messi, claro que de vez en cuando topámonos con un pepe cualésquiera que dexanos temblando. Finamos 9.34 cotcha torres (1868), tiritando caltiennos la brisa, por nun dicir la ventolera, xoserra nun dexa de mirar pala pena la capiya, pero güei tamos siguiendo indicaciones de la fempa y la fempa nun quiso saber na d’ayer, vamos pala llende con tierres casines, a ver como facemos pa nun pisar el reinu de llión que tiennoslo prohibidu el gobiernu la nación.

Anque espelurciaos, darreu siguimos pela pergüapa sienda la hoya pa dar 9.49 na cotcha valverde (1902), cagunros, aprieto tanto’l sombreru que si la brisina me lu arranca adios gargüelu, asina y tou, güau, menudes vistes, como diz l’amiga paloma, güeyase casi tol mio arzobispau que arzobispu destes tierres nomome l’amigu freije, y eso tien más valor que’l más inxustu decretu-llei.

Vamos subiendo fastera arriba, voltiando la mole del torres, cuando tamos protexios de la brisa sentámonos un poco a reponer fuercies.

 trabayu costo llevántase, paez ser que dixe a güelito que siguiera más p’allantre, el casu ye que yo culpo a xoserra, el resultau fue que la vara ablanu atollose y güelito mandome chai una güeyada al muñecu tontu, nun facía falta, ya sabíemos que tabemos pasaos de frenada.

Quisimos atayar, dios que fría taba la piedra, ante’l riesgu seriu d’enriscamientu, media vuelta, unos metros p’abaxo a dar col senderu, nun yera el que yo dicía pero dexonos casi arriba, nel camín de tola vida.

11.03 torres (2104) fueya ign 79.3, lo primero enseña-y a xoserra la canal que nun coyimos.

 dempués face-y a regañadientes la semeya cumbre y tirar p’abaxo a toa leche, redios, un minutu más y riesgu conxelación, claro que tenía razón xoserra, si poneis una chaquetina igual teneís menos fríu, xode dar la razón, asina que nin chaqueta nin osties, del norte semos y de fríu morreremos, pero chaquetes en xunu, non.

Baxando atopamos a 3 llavianenses, los únicos que vamos ver el tola xornada, a les 11.41 tamos nel cotcheu la ventanona (1876) 

saltámonos el picu, güei va ser l’únicu que saltemos, vamos de frente a 12.34 la forcada llagu (1875), el mayu floridu que robonos el gobiernu tamos esfrutándolu un poco güei.

 retorciendo'l pescuezu

a la manzorga, los puertos del contorgán

toca subir al siguiente finxu de la fempa, pal valmartin empobinamonos

12.55 valmartin (1932), l’aire ya más sele y sobretou menos fríu, pasamos 13.17 pela raya valmartín (1822), otru picachu, como nun paez nada tiramos palla, 13.24 porru blancu (1867)

baxamos a la raya fontanietcha (1847) y enfilamos l’arenal (1885).

restolamos nos cacharros tenolóxicos a ver si esti ye de la fempa, peron non, la fempa nun achico espacios, y yo do-yme cuenta cuando veo la baxada qu'esti tenía cavilao rodialu.'

y siguimos baxando

nun se vayan entovía

qu'esto nun tien fondu

14.06 raya bueya (1745) una paraduca pa char un tragu y mirar p’arribona, asina sele, sele, les pates nun dan pa más vamos pasín a pasín pela florida fastera, les vistes ablucantes pa tolos vientos, pero sobremanera cuando torcemos el pescuezu.

 igual ye que tamién recobramos algo de resuellu, que caminar col pescuezu xirau ye permalo y por tantu nun lo facemos, tamos quietinos.

dende'l 14.25 entrepicos (1861)

 tercer finxu, la fempa nun dexanos facer más, asina que’l cascayón, pena’l vientu... pa otra vegada.

Tornamos casi pisando les mesmes flores a la raya bueya

 vamos buscando un sitiu soleyeru y un poco protexiu del aire pa sentar la culera y entamar a morder el bocadillu, que ya va pesando na mochila y ya van a dar les 3.

 reemprendemos camín cuando damos colos montañeros de la mañana, van pala pena’l vientu, a nosotros llamaronnos de la raya que teníe llegao ya’l camión de la cerveza, prioridad ye prioridad.

15.08 pasamos pela fontanietcha (1792)

 nun sabemos como ta l’agua, güei llaurienzu nun nos atizó, 15.19 algamamos la raya valmartin, vamos ya dir contrabaxo, atopamos bonos senderos que empobinennos na bona direción.

charcucos pa refrescar les sueles de les chiruques

Pasamos pelos collaos de la raya col güeyu puestu nuna campera tchena vaques.

 llegamos a les vaques, les vistes del torres son ablucantes.

 como ablucante resulto a partir d’equí el furar pente los piornales.

 

pa finar dando 17.03 na raya.

y ya encargar la cerveza enantes de cruciar la carretera

Camudase y tomar la cerveza remembrando los 13,75 km. 5,44+3,14=8,58 hores, dende los 1480 a los 2104 total 1165 de desnivel,

vel media 1,53, promediu 2,40 total 4563 puntos, que pa eso avisarónnos que tenía llegao el camión.

02-01-2009 Atambos

LA FELGUERINA-COLLAU LA CANALINA-ATAMBOS-LA FELGUERINA

Llego a Pola Llaviana y como ya ye costume los chigres tan pechaos, nesti pueblu nun madruga naide, enseguía lleguen Emilio, Josito, Jordi y Luis Enrique, desayunamos con calma na confitería Conchi, un llugar perafayaizu onde los haiga.

Güei costome trabayu salir dela cama, pero ya lo tomo como asuntu personal, o termino cola gripe o termina ella conmigo.

Aparcamos los carruajes, si si carruajes, más de 200 caballos tiren de nosotros, na entrá la Felguerina (760), hay nieve na carretera.

Entamamos la caminata cuesta baxo, mal comienzu, nalgún momentu habrá que recuperalo, la sensación dura poco, enseguía se empina'l camín, ye la segunda vegada que paso por esta pista y la segunda que ta xelá.
Paramos a poner les raquetes, que na mochila no faen más qu'estorbar.

El día ta soleáu anque frío fai asgaya, salimos al colláu Vallegu (1500), el cielu azul, la ñeve blanca, prestoses güeyaes pa tolos alredores...el esfuerzu recompensau ente tosíu y estornudu.

Ñeve abondo, les raquetes amortizaes, nel colláu La Canalina (1563) xiramos pala manzorga, dudíamos si seguir, la ñeve ye xelu, vese el fondu pero muy abaxo, neso Josito ya ta a media fastera, d'alguna pallabra malsonante y p'alantre, con muchu cuidadín y d'algun qu'otru cagamentu.

Salímos al sol, respiramos profundamente, miramos p'atrás y p'abaxo, falta garrotazos tenemos, tamos nel colláu Atambos (1623) queanos esguilar al picu, Jordi entierrase na ñeve, entrugamos-i si ta faciendo'l metrotren...

Cumplía la misión de güey. Yerá hechai una güeya al buzón, lleva mal el pasu del tiempu, escasu añu de vida y ta apagáu, ensín brillu, murniu, tamos un buen ratu, afayaizu llugar... calienta'l sol, xintamos seliquinamente, buen sitiu pa dexar la gripe pero na, la condená quier seguir comigo.

Baxamos colo vista puesta nel Pandu la Cerra, vamos acortíar un buen trechu, la ñeve ta caprichosa, agora blanda, agora dura, agora... Nuna deles munches ocasiones que nos fundíamos más p'arriba les rodielles subeseme'l xemelu... una molestía más.

Vemos les lluces del pueblu a lo lexos, faisenos de nueche. Nel chigre (centru social) al calor dela estufa chamos un buen ratu entreteníos en plática colos paisanos, ya de nueche cerrá, apalpando los coches, camudamonos apriesa -facía frío- y a tientes na más asoluta intimidá.

Caleyamos tol día pa facer 12 km. ente la ñeve.
Al agravamientu griposu xuntose-i una rotura fibrilar nel xemelu.

09-08-2008 Pelacera

ORLE-PURUPINTU-PELACERA-MELORDAÑA-ORLE

Salimos de Xixón a les 8.30, desta vegada vamos pocos, la verdá muy pocos, con un coche basta y sobra, llevalu Victor, pa salir de la mancadura pon una ruta bastante esixente, finamos faciendo 20 km. y 1100 m. de desnivel.

Paramos en Llaviana, son les 9 de la mañana y la confitería entovía ta pesllá. Abrenla entoncenes mismo, col bartolu y el café ente pechu y espalda el día ya paez otra cosa.

Son les 10.10 cuando entamamos a caleyar pelo cimero'l pueblu d'Orle (650) ya resplandiez el sol anque nun pasa de los 14º. Vamos pel Valle del Ríu Mediu a la solombra la biesca. Dexamos-y pasu a un paisanu que baxa col caballo del ramal, aprovechamos pa parar un poco, ya vamos sudando bonamente.

El camín empinase entovía más, llegamos al Mayáu Felguera (1300) seguimos pela drecha hasta algamar el Colláu Friera (1345), ante nuesos güeyos apaecennos unes impresionantes vistes, tras breves momentos de contemplación seguimos camín.

Crucíamos la Xerra los Duernos pela Pasá'l Mosquitón (1428), vamos pela parte riba del monte Purupintu. Intentamos ataxar pero salnos mal, volvemos al camín.

En poco más llegamos al Colláu Cardú (1586) tenemos l'oxetivu a tiru piedra. Descansamos un ratín, una galletina, un tragu d'agua y en diez minutos tamos na picorota, el Picu Pelacera (1629) sol y mosques, putes mosques que nos echen del cumal.

De nuevo nel Colláu Cardú, tiramonos monte abaxo pela Foz de Filispardo, ta mala de baxar pero ensin agua baxase bien, vamos dar al Mayáu Melordaña (1260)

Afayaizu y guapu mayáu, cabanes abondo, unes esfarraplaes pel suelu, otres entovía non.
Sentamonos a xintar, a la vera una bona fonte y al sol, lo que diz que, o nun calentaba muncho o habíemos caleyao poco.

Faense realidá les peores veleés, el mio pan, nunca tan queríu, queo escaecío nel coche, nunca xinté un bocadielllu con tan poco pan.

Baxamos pela Foz de Melordaña, saltando de piedrona en piedrona, menos mal que taba seca del too. En Conforcos topámonos de nuevu cunos montañeros, habíennos adelantáo aprovechando la paradina pa xintar.

Baxamos a la vera'l ríu pel Valle Los Tornos, coxemos l'anchu camín que bien de Pendones y que nos dexa n'Orle, son algo más deles 17.00

Va costandome trabayu esti últimu tramu, voy coxeando, a una de les botes dio-y por tocar los coxones, perdón, el calcañu. Fizose llargu'l camín, además lorenzu apretaba per bien.

Una bona fonte na entrá'l pueblu, casi la dexamos seca. Les botes ya tan nel vertederu... ¿Incinerarales Tinin o charales a l'embalse de Caliao? Quicías les cuelgue de los cables de Lada-Velilla pa espantar a los paxarones de los ecoloxistes.

Finamos como hay que finar estes coses, una cerveza, solo una y colamos enantes que se dierán cuenta que habíemos bebio to l'agua de la fuente.