02-01-2009 Atambos

LA FELGUERINA-COLLAU LA CANALINA-ATAMBOS-LA FELGUERINA

Llego a Pola Llaviana y como ya ye costume los chigres tan pechaos, nesti pueblu nun madruga naide, enseguía lleguen Emilio, Josito, Jordi y Luis Enrique, desayunamos con calma na confitería Conchi, un llugar perafayaizu onde los haiga.

Güei costome trabayu salir dela cama, pero ya lo tomo como asuntu personal, o termino cola gripe o termina ella conmigo.

Aparcamos los carruajes, si si carruajes, más de 200 caballos tiren de nosotros, na entrá la Felguerina (760), hay nieve na carretera.

Entamamos la caminata cuesta baxo, mal comienzu, nalgún momentu habrá que recuperalo, la sensación dura poco, enseguía se empina'l camín, ye la segunda vegada que paso por esta pista y la segunda que ta xelá.
Paramos a poner les raquetes, que na mochila no faen más qu'estorbar.

El día ta soleáu anque frío fai asgaya, salimos al colláu Vallegu (1500), el cielu azul, la ñeve blanca, prestoses güeyaes pa tolos alredores...el esfuerzu recompensau ente tosíu y estornudu.

Ñeve abondo, les raquetes amortizaes, nel colláu La Canalina (1563) xiramos pala manzorga, dudíamos si seguir, la ñeve ye xelu, vese el fondu pero muy abaxo, neso Josito ya ta a media fastera, d'alguna pallabra malsonante y p'alantre, con muchu cuidadín y d'algun qu'otru cagamentu.

Salímos al sol, respiramos profundamente, miramos p'atrás y p'abaxo, falta garrotazos tenemos, tamos nel colláu Atambos (1623) queanos esguilar al picu, Jordi entierrase na ñeve, entrugamos-i si ta faciendo'l metrotren...

Cumplía la misión de güey. Yerá hechai una güeya al buzón, lleva mal el pasu del tiempu, escasu añu de vida y ta apagáu, ensín brillu, murniu, tamos un buen ratu, afayaizu llugar... calienta'l sol, xintamos seliquinamente, buen sitiu pa dexar la gripe pero na, la condená quier seguir comigo.

Baxamos colo vista puesta nel Pandu la Cerra, vamos acortíar un buen trechu, la ñeve ta caprichosa, agora blanda, agora dura, agora... Nuna deles munches ocasiones que nos fundíamos más p'arriba les rodielles subeseme'l xemelu... una molestía más.

Vemos les lluces del pueblu a lo lexos, faisenos de nueche. Nel chigre (centru social) al calor dela estufa chamos un buen ratu entreteníos en plática colos paisanos, ya de nueche cerrá, apalpando los coches, camudamonos apriesa -facía frío- y a tientes na más asoluta intimidá.

Caleyamos tol día pa facer 12 km. ente la ñeve.
Al agravamientu griposu xuntose-i una rotura fibrilar nel xemelu.

21-12-2008 Col.la Palacios

FELECHOSA-FOCES DEL PINO-COL.LA PANDU-COL.LA PALACIOS-PUENTE LA MUÑECA-FELECHOSA

En Xixón ni frío ni calor, a cero grados esperando, mentanto a dalguna se-y poníen les oreyes roxes a los que somos puntuales taben poniendosenos tieses pol frío.
Vamos en dos coches hasta Felechosa; Victor, Victor I, Ana P, Josito, Cundi, Ana B y Montse, dexamos el coche aparcáu ente la ñeve.

Desayunamos y colamos direición al Pino, enantes un paisanu tomanos por llocos y casi nos ruega que desistamos "si quereis ñeve subir al puertu"

Cuesta trabayu caltenese en pie, agarraos a les muries y tropezando colos coches llegamos al Pino, milagrosamente ensin posar la culera nel suelu. Dexamos l'asfaltu, ye menos resbaliosu el camín.

Cuanta más ñeve hay más ropa sobra, curioso, igual ye polo pindio'l camín. La ñeve y la cantidá d'agua que baxa faen que les Foces tean espectáculares.

Na penumbra de les Foces vamos casi a ciegues, salimos nes Campes (1050) y cieganos el sol.
El camín morrió, ta enterráu baxo un metru ñeve, asina que tiramos por onde bonamente poemos.

Vamos pol valle del Pedrosu p'arriba, nel cielu ni una triste nube, atrás queen atapaes pola ñeve les cabanes del Pedrosu.

Frente a nos apaeznos el Retriñón, a la drecha vamos dexando Peña Reonda, algamamos la Col.la Palacios (1461), la vista pierdese ente milenta y más picos, pa mio paecer destaquen el Estorbín, el Torres y Peña Mea.

Agradiezse el falsu llanu, ente pisaes de llobos llegamos al Col.láu Pandos (1472) xintamos en corro y de pie, discurriendo'l siguiente pasu.

Tamos nos pies de Peña Melera, meyor dexala pa otra ocasión, nun traemos los medios téunicos necesarios...

Tras dudiar unos instantes por mor del estáu de la ñeve tiramonos p'abaxo seliquinamente con esmeru en nun resbaliar, nun vaya paeceí mal a dalgún que lu alantres.

El empeñu en nun resbaliar tresformase nel deseu de nun quear enterrau.
Faise imposible esi deseu, más p'arriba de la cintura nos empozamos, eso los más altos.
Llegamos a los Gallos (1220) ensin atopar ninguna sebe, toes taben atapes pola ñeve.

Agora metemonos na biesca, pol pindiu, embarráu y resbaliosu senderu, pegaos a la paré que fai la llabor d'escuela de escalada.
Llegamos a la carretera, crucíamosla a la altura del Puente la Muñeca pa seguir pel camín hasta Felechosa (650).

En metá'l pueblu nos camudamos, chamos-y voz al paisanu que nos aconseyo pela mañana, diximos-y lo que ficimos, percatose que tabemos bien (fisicamente) y gruño algo paecío "refalfiaos ye lo que tais... si vos lo mandarán..."

Asina transcurrio la xornada, caleyando 14.3 km. pa xintar de pie ente la ñeve y finar tomando un café a les 17.00 nel mismu sitiu que lu habíemos tomao a les 10.10.
Coses de los Meniskos.

28-11-2008 Picu Peña

NOREÑA-CELLES-PICU PEÑA-MUÑO-PICU SOL-VEGA

Otra xornada d'agua y fríu, acércome a Uvieu nel tren de la renfe, na estación tan Juan Carlos y Bernardo, coyemos otru tren, agora de la feve, déxanos en Noreña, a les 9.30 nun se sabe en que mediu trasporte lleguen Riestra y Eduardo dende Xixón.

Dempués de tomar seliquinamente un café ponemonos a caleyar, güei ye casi to asfaltu, arrivamos a Celles nun continuu subir y baxar, enantes pasamos per Espiniella y la Belga ente otros munchos llugares. Facemos una bona pausa admirando y retratiando les ruines del palaciu de Celles, y chando una bona parolada col guardian que mora nestes ruines, que ya tien un buen montón d'años nes espaldes.

Corríxenos el rumbu, damos un rodeu pa nun pasar por onde diz que nun pasa él ni con kachusques. Finamos empericotaos nel picu Peña (429), güeyaes a mediu Asturies, bueno una cuarta parte, la otra cuarta ta tapecía poles ñubes.

Baxamos pelos praos a la carretera Si-15 y subimos a Muñó (330).
El tiempu va de mal en peor, metémonos nel chigre, ta frio y lloviendo guapamente, la paisana encomiendanos que lo dexemos pa otru día, apurrenos un pinchín de xamón y colamos ensin face-y casu, semos necios a torcer.

Llegaos a les Cabanes (450) pasamos a la vera'l picu Carbonera, ya na carretera asitíamonos nun llavaderu onde poemos da-y a la xintadera sentaos y a techu. Tamos xusto perriba Xixón.

Aprovechamos la ocasión pa ponenos más encima, atalayámonos nel picu Sol (439), nun atisbamos ná, dende'l cielu paez que ta cayéndonos el mar enteru.
Baxamos a Llavandera... y quién s'atreve a dicir que Xixón nun ye un pueblu, tópome con Emilio y vamos tomar un café con Eduardo, ¡siempre ta nel chigre esti rapaz!

Paecen sorprendios de veme per allí, y más caleyando y más entovía baxo esi agüaceru. Carretera abaxo per Aroles y Vega, enfocamos la senda fluvial, y el puente peslláu, recien pintau rezaben los cartelos y la cadenona, nun atopamos llugar afayaizu pa cruciar el riachuelu, igual yeren les poques ganes d'investigar... son les 17.20.

Asina, col plan camudau secámonos na parada mentanto esperamos l'autobus, per Xixón van posándose ya oscurecío, nosotros llegamos hasta la estación de renfe, y al tren, son les 19.00 cuando entro en casina.

Un día de perros, ensin contar los que nos lladrarón, más de mil ensin esaxerar, y de transporte públicu, tres trenes y un autobus, pel mediu 740 m. de desnivel y casi 30 km, más que caleyando navegando, tardamos 7 hores y 25 minutos que incluyen de too, atechaos nel chigre, nos llavaderos y onde nos dexarón y bonamente pudimos.

19-11-2008 Picu Mayor

CASA CAYON-PICU LA CRUZ-PICU LA CABRA-PICU MAYOR-PICU TRAPA-PICU MUA-CECEA

Coxó a Paco debaxo mio casa y colamos pal Berrón, xuntámonos con Bernardo, Juan Carlos, Manolo y Riestra, el día ta malu, vamos dir cerca, acercámonos a Ca Cayón.

All lláu l'apeaderu Pindueles (158) entamamos a caleyar, tamos nel km. 360 de la N.634, son les 9.15 y llueve guapamente, enseguía coxemos un camín a la manzorga y repechu vien repechu va enseguía nos ponemos percima les ñubes.

El día nun acaba d'abrir, ta frío y la borrina ca vez ye más espesa, caleyando pela Sierra de Ques atopamonos nel Picu la Cruz (654) resalta ente la ñeblina poles dos banderes d'España que lu coronen. Vagamos pela biesca en busca del meyor senderu, valnos un cualquiera.

Pasamos pol picu La Cabra (696) y algamamos el Picu Mayor (770) pel mediu'l pinar baxamos al Colláu Maza (566) onde s'asitía una piscina pergrande, dicen que ye pa coxer agua en casu d'incendiu, nun apetez na bañase, ya nos cai agua bastante del cielu.

Vamos camín arriba, ta to tapecío pola borrina pero percibimos que tamos nel cordal de la Mua, aalayamonos nel Picu Trapa (795), baxamos al Colláu Brañabernés (787) frente a nos adivinase algo muy grande, vamos p'allá.

Tamos nel Picu la Mua (987) asina lo reza'l cartelu del buzón, paramos poco, a la borrina sumase la ñeve qu'entama a cayer, de vuelta en Brañabernés xiramos a la manzorga.

Baxamos y subimos, pasamos por Lamesón (698), La Gamonal, Monte Espesu... na Cueva Alta paramonos a xintar baxo los bistechos duna cuadra, pegaos a la paré, separtaos del mundo por una cortina d'agua, y con un perro falderu esperando poles sobres.

Seguimos, agora per un camín, en Rega ya cerca de Cecea alcontríamos un taxi a la vera'l camín, chamos-y voz al taxista que lleva a los conductores y al tesoreru hasta los coches.

Volvemos al apeaderu de Cecea (km. 371) a buscar al restu la expedición, ya secos paramos nun chigre poco enantes de Nava, pa entrar en calor.

Asina danos por finada esta xornada d'apeaderu a apeaderu, regá con abundante agua, fuerón 14 km. en 7 hores y un desnivel acumuláu de 980 m.

09-11-2008 Pena Mea

PEL.LUNO-PEÑA MEA-COL.LA DOÑANGOS-VILLORIA

En Xixón coxemos l'autobus, primera parada Cabañaquinta, llarga parada na cafetería, mercar el pan y pa l'autobus que nos dexa nel Barrobaxo de Pel.luno (538), tamos un buen ratu y eso que nun hai escaparates.

Llega otru autobus llenu, colen pa otru llau, a les 9:50 entamamos a caleyar, atraviesamos el Barrucima, van mil paraes y más semeyes que na selmana Cibeles fasssshion.

El día ta gris y murniu, de momentu nun llueve. Poco enantes de la Col.la Pel.luno sentámonos a esperar, la xente bien xeliquinamente. Tornamos a la drecha camín alantre.

La Pena güeyase pimpanuda, vamos demasiao a la drecha, culpa mía, subimos per una canal menos transitá, más montascosa, vemos L'Arcón dende otru ángulu.

1000 semeyes dempués seguimos esguilando, esto paez una verdulería n'hora punta. Nos últimos metros triamos ñeve, el mieu a esnidiar fai que la xente se calle.

Ye la una, tamos nel cumal, Pena Mea (1557), les vistes ablucantes, el cielu gris y el frío no nos echen p'abaxo. Na cara norte hai muncha ñeve asina que vamos tornar pel mismu sitiu que vinimos, primeros avisos a la xente de que va chasemos la nueche encima, ni putu casu.

Ente rises y semeyes y más rises que yos entren cuando ven que se pasarón un buen trechu, un grupu grande, casi toos taben ya cerca de Les Campes, hay que subir a la Col.la Doñangos (1033).

Cansaos d'esperar, Victor y Yo colamos en busca de Sonia y Ana, que nun subíen al Picu, ya tan nel pueblu cansaes d'esperar.
Sentamonos a xintar nun afayaizu área recreativa en Prau Bra (928), son les 16.30 y va llegando la xente.

Agora echo a caleyar con Pina, baxamos pa Fechaladrona (650) per una pindia pista, d'aquí a Villoria (344) por asfaltu, son les 18:15 cuando llegamos baxo los focos a la ilesia del llugar.

Nun ye que nos recibierán como a estrelles del cine, les faroles ya taben prendíes.
Camudamonos a la vera la ilesia na intimidad que da la nueche, va llegando la xente ya ye nueche cerrá.

Tomamos algo de priesa, apuraos otra vegada por mi culpa, y ye que tengo que trabayar esta nueche... llego col tiempu xustu.

Fuerón 19,3 km. y 1200 m. de desnivel nun montón d'hores, más de 8, y aguanto esnin llover.