28-11-2008 Picu Peña

NOREÑA-CELLES-PICU PEÑA-MUÑO-PICU SOL-VEGA

Otra xornada d'agua y fríu, acércome a Uvieu nel tren de la renfe, na estación tan Juan Carlos y Bernardo, coyemos otru tren, agora de la feve, déxanos en Noreña, a les 9.30 nun se sabe en que mediu trasporte lleguen Riestra y Eduardo dende Xixón.

Dempués de tomar seliquinamente un café ponemonos a caleyar, güei ye casi to asfaltu, arrivamos a Celles nun continuu subir y baxar, enantes pasamos per Espiniella y la Belga ente otros munchos llugares. Facemos una bona pausa admirando y retratiando les ruines del palaciu de Celles, y chando una bona parolada col guardian que mora nestes ruines, que ya tien un buen montón d'años nes espaldes.

Corríxenos el rumbu, damos un rodeu pa nun pasar por onde diz que nun pasa él ni con kachusques. Finamos empericotaos nel picu Peña (429), güeyaes a mediu Asturies, bueno una cuarta parte, la otra cuarta ta tapecía poles ñubes.

Baxamos pelos praos a la carretera Si-15 y subimos a Muñó (330).
El tiempu va de mal en peor, metémonos nel chigre, ta frio y lloviendo guapamente, la paisana encomiendanos que lo dexemos pa otru día, apurrenos un pinchín de xamón y colamos ensin face-y casu, semos necios a torcer.

Llegaos a les Cabanes (450) pasamos a la vera'l picu Carbonera, ya na carretera asitíamonos nun llavaderu onde poemos da-y a la xintadera sentaos y a techu. Tamos xusto perriba Xixón.

Aprovechamos la ocasión pa ponenos más encima, atalayámonos nel picu Sol (439), nun atisbamos ná, dende'l cielu paez que ta cayéndonos el mar enteru.
Baxamos a Llavandera... y quién s'atreve a dicir que Xixón nun ye un pueblu, tópome con Emilio y vamos tomar un café con Eduardo, ¡siempre ta nel chigre esti rapaz!

Paecen sorprendios de veme per allí, y más caleyando y más entovía baxo esi agüaceru. Carretera abaxo per Aroles y Vega, enfocamos la senda fluvial, y el puente peslláu, recien pintau rezaben los cartelos y la cadenona, nun atopamos llugar afayaizu pa cruciar el riachuelu, igual yeren les poques ganes d'investigar... son les 17.20.

Asina, col plan camudau secámonos na parada mentanto esperamos l'autobus, per Xixón van posándose ya oscurecío, nosotros llegamos hasta la estación de renfe, y al tren, son les 19.00 cuando entro en casina.

Un día de perros, ensin contar los que nos lladrarón, más de mil ensin esaxerar, y de transporte públicu, tres trenes y un autobus, pel mediu 740 m. de desnivel y casi 30 km, más que caleyando navegando, tardamos 7 hores y 25 minutos que incluyen de too, atechaos nel chigre, nos llavaderos y onde nos dexarón y bonamente pudimos.