30-01-2009 Cuetu Millaro

MILLARO-COLLAU FARRAMEDAL-ALTU SEXTEOS-LLANU'L PRADO-MILLARO

Llevo a Paco fasta Uvieu, tan esperendonos Juan Carlos y Bernardo, en Mieres ya tan Eduardo y Riestra col cafetín.

Vamos pa Castiella atraviesando'l Puertu Payares, tras mercar el pan en Busdongo allegámonos a Millaró (1370) dexamos los coches nes afueres, la ñeve impidionos metelu dientro'l pueblu.

Nun hai un alma, solo un solitariu perru con ganes de compañá, el termómetru marca 6º, pero l'aire fai que paezcan una docena menos. Tras poner polaines, gorros, guantes y guardar los paragües, l'airón fa-ylos inútiles, entamamos a pisar la ñeve.Colamos pel pueblu arriba fasta coyer una pista a la drecha, enseguía llegamos al Colláu Carrozal (1530), seguimos darreu anque nun se güeye na. Dende'l Colláu Farramedal (1705) atisbamos los alredores de Carmenes, pasamos averaos al Picu Camino, ente la ñeve y la borrina vemoslo too blanco, asina y too siguimos col plan.

Nun destos cercaos modernos, con patiu central y ensin techu paramos un ratu, como sigue cayéndonos la ñeve perriba la tiesta enfilamos pa la cumbrera, a falta de camín en llínea reuta.
Solo fuerón 150 m. de desnivel, asomase a la crestería y casi que salir volando, y anque la ñeve te blanda nun apetez ná baxar dando cucurrabucos.

Asina que media vuelta, anque temos a un palpu, güei a güeyu nun se pue midir, del oxetivu, Braña Caballo o Cuetu Millaró.
Baxamos pela Muria del Sapu (1900) y nos Llanos del Prado atopamos un refuxiu onde abelluganos, firmamos nel llibru de visites y tras barrer la cabana colamos lladera abaxo.

Dende'l Colláu Carrozal (1507) ya atisbamos el pueblu, la ventisca fai dañu na cara.
Un perru guardian a cambiu dunes migayines danos el beneplácitu pa xintar a techu baxo'l tendexón duna casa.

Metémonos con too nos coches pa baxar fasta Busdongo, entramos na estación y bien pegainos a los radiadores camudamonos mentanto calecemos un poco.

Con ñeve, airón y borrina, en cuatro hores caleyamos casi que 11 km. y subimos un desnivel de 935 m.
Finamos viendo'l telediariu nel chigre del Altu Payares. Ensin priesa baxamos el Puertu.

14-09-2008 Peña Mora

LA UÑA-PEÑA MORA-PEÑA NEGRA-PIO-RIBOTA

Ya entamamos la xornada de manera acidentá, nel autobus nun cabemos toos, y eso ensin contar coles mochiles, nun ye que seamos munchos pero nun cabemos. Tráennos otru autocar... ya entamamos con media hora retrasu, como güei vamos cerca.

Na Pola Llaviana otru batacazu, la confitería ta pesllá por vacaciones, menos mal que hai más chigres, Alberto, el de tola vida madrugo güei, ¿quedoté dalgún pinchu? menos mal que yeremos pocos.

Llegamos a Castiella, na Uña (1170) son más de les 11, la temperatura un poco fresca, perfeuta pa caleyar, ta asoleyáo, de les ñubes nun hai rastru.

Victor I. fai güei la llabor de guia, ¡reparte fueyes! un aplausu Victor, salío too perbien, ya tamos esperando pola próxima anque Gelu diz que la va entamar él, que na fueya va incluyir servilleta, a ver cuando ve la lluz esta idega, seguru que s'enllenen dos autobuses.

Caleyamos pela pista, l'únicu inconveniente'l desnivel qu'anque nun sea muy pronuncíau nun acaba d'enllanar. Pasamos pel Mayáu Campos de María (1320), la Hoya de Bordecazo (1400) p'algamar el Puertu de la Fonfría (1700).

De frente Peña Ten, no nos asusta pero torcemos pala drecha, ya nun hay oución pala ruta b asina que to cristo a crestiar hasta empericotase na Peña Mora (1876).

Son casi les 2, dalguién amaga con sacar el bocadillu, nun la dexamos, baxamos pela pindia fastera, ta llimpia y ándase bien, a dalgunos afeutanos enforma'l sol, danos por dir tras Josito.

Como cabres, será la fame que nun dexa que llegue l'osixeno a la testa. Dámonos cuenta cuando tamos asitiaos na picota de Peña Negra (1849). Baxamos pel mismu sitiu pa parar a xintar xunto a un rebañu vaques.

Tras un bon descansu, bastante mayor pa los que nun ficierón el cabra, seguimos senderu abaxo hasta'l Mayáu Tronceda (1300), ¿teitos? ¿un poblau teitos pa turistes? mala recreación del pobláu d'Asterix.

Los bárbaros que fixerón esto y los más bárbaros que lo permiten, ¿Había teitos perequí? techaos con rafia d'esa barata del Leroy Merlin, increyible, de xuru que Obelix nun atopaba xabalis per esta zona, salíen axorizaos desta aberración.

Baxamos pela pista, a los turistas hay que traelos en touterrén, pel mediu un fayeu, tras pasar averaos a una minicentral llegamos a Pio (750), pueblin que por nun tener chigre queó ensin agua na fonte.

Un cachin de carretera más alantre topamos un camín llenu d'artos y ortigues que nos dexa en Vierdes (620), tampoco hay chigre asina que tamién quearón ensin agua.
Pela biesca baxo la mirada de dos guardies del parque que nin entruguen nin saluden...

En Ribota Baxu (530) ta esperandonos un preciosu autocar, son les 19:00.
Nel Desfiladeru de los Beyos, ya na parte d'Asturies, mercamos quesu anque apetezca más una cerveza.

Tras presenciar pela carretera nacional un desfile de gochos celtas, ¿ondé tá tráfico? subimos al autobus que nos dexa en Xixón en tiempu record... un aplausu pal chofer, rápidu y seguru amás de simpáticu.

19-08-2008 Pozalón

PIO-COLLAU LLAETE-POZALON-PIO

Bernardo, Juan Carlos, Angel, Eduardo, Riestra y Yo somos los que tamos a les 8:00 na Villa, tras dar cuenta del café y mercar el pan tiramos hasta Oseja na cercana Lleón, una carreterina que sal pela drecha dexanos en Pio (740).

Son les 10:15 cuando comencipíamos a caleyar, ta fresco y lo que ye peor, el cielu cubiertu, baxamos hasta'l ríu Zalambra pa crucíalu per un acicaláu puente a la vera un remozáu molín.

Anicíamos l'ascensu per una pista bien ancha, nun hai descansu hasta algamar el Colláu Llaete (1400), nun se ve ni torta y el forru polar nun y lu dexo a naide.

Xiramos a la drecha camín del Mayáu de les Merines, un pasu más y tamos enpericotaos nel picu Pozalón (1744).

Nun se ve ná, pero ná de ná.
Tamos un buen ratu hasta que convencíos damos la vuelta. Dexamos una cuenta pendiente con Niaju.

Enantes de tornar a la Collá Llaete pasamos pel Porru Cervalina (1635).
Alcontríamos una afayaiza cabana onde ponenos a xintar, enantes teníemos apañao un poco de té y dalgun virueganu.

Pela metá la pista xiramos de sópitu a la drecha, caleyamos per un senderu acabante de rozar, ente vuelta y revuelta pasamos per debaxo d'unes maromes d'aceru, va tiempu sirvíen pa baxar mineral de les mines.

Ya crucíamos el puente y poco más alantre tamos en Pio, son les 16:30. caleyamos 15 km y 1080 m. d'ascensu n'apenes 6 hores.

Nel mismísimu desfilaeru de los Beyos tomamos una cerveza, y pa casa qu'entovía ta lexos, dexáronme na mesma a les 19:15, tolos chigres del pueblu pesllaos, tol mundo de folixa nel práu la fiesta.