27-08-2008 Fariñentu

TUIZA RIBA-MEICIN-CANALON OSCURU-PRAU ALBU-FARIÑENTU-TUIZA RIBA

Angel ye l'encargau de recoyeme güei, son les 7:30 y n'Uvieu ta Juan Carlos, en Mieres xunténsenos Alberto y Riestra.

Nel mismu chigre tan desayunando algunos collacios del grupu Ensidesa, alli los dexamos mentanto fuera nun para d'orpinar.

En Tuiza Riba (1240) nun orbaya ya tamos perriba les ñubes, non contentos con ello siguimos p'arriba, enseguía damos nel abelugu del Meicín (1380).

Paramonos un ratín queriendo entender la integragión desti estilu urbanu postmodernu nesti paraxe alpinu, quiciabes sea la cercanía, tan solo 40 minutos de la civilización.

Abrimos el grifu pa coyer agua, aprovecha un burro pa beber ¡que civilizáu! será l'arquiteutu, non paézseme más al de mediu ambiente.

Xiramos a la drecha, nun paez pindio, ye muncho más que pindio, ensin resuellu algamamos la Forqueta del Portillín (2020), son les 10 y 20 y el sol ya entama a calecer.

Ablucaos peles vistes, el Siete, los Castillines, los Fontanes, el Fariñentu, Peña Rueda..., aprovechamos la solombra pa reponer l'aliendu.

Vamos subiendo y baxando crestería p'alantre, cumal va cumal vien... el primeru el Canalón Oscuru (2142) dificil de baxar, la yerba llarga y seca fai que baxemos con tientu.

Agora toca trepar un poco p'algamar la picorota del Palazana (2128) y siguimos pela crestería, güayando pa un lláu y pal otru.

Y dexando tarxetes, agora toca'l Práu Albu
(2130) y el Pie Ferreru (2099).

Apenes ye la una, asina que enfilamos el Fariñentu (2168), ya ta faciendose llarga la xornada, Angel ye'l primeru en manifestalo.

Tocamos el buzón, les vistes abarquen nuevos horizontes, entra un poco de calima, pero'l día ta de restallón, fai sol y la temperatura aquí nel cumal ye soportable.

Decidimos baxar un poco pa xintar, baxamos hasta'l Bocarón (1878) el Siegalavá enfrente (pa otru día).

Pela Cuenchona tal paez que temos metíos nun fornu, casi ensin agua y col bocadillu na espalda en vez de na barriga.

Damos cola bañera que fai de pilón na fuente L'Aguilón, espantayo les vaques y faigo como elles, metó'l cabezón y suerbu hasta que nun me quepa más, polo menos llego con algo na barriga a Tuiza Riba.

Sentaos un ratu nel corral del chigre, son les 3 de la tarde, cuando ya colabemos apaeznos una visión pre-celestial, la chigrera que subía cola mercaduría.

Agora si que vien la güeyada celestial, la paisanina con esos tanques de cerveza, na solombra del corralín colos bocadillos na mano... y el café de pota que la santa señora nun entendía ensin les pingarates d'anis de l'asturiana.

Asina transcurrio el día, 6 hores y media con munchu calor les dos últimes y 1240 m. de desnivel acumulau en 12 km.

19-08-2008 Pozalón

PIO-COLLAU LLAETE-POZALON-PIO

Bernardo, Juan Carlos, Angel, Eduardo, Riestra y Yo somos los que tamos a les 8:00 na Villa, tras dar cuenta del café y mercar el pan tiramos hasta Oseja na cercana Lleón, una carreterina que sal pela drecha dexanos en Pio (740).

Son les 10:15 cuando comencipíamos a caleyar, ta fresco y lo que ye peor, el cielu cubiertu, baxamos hasta'l ríu Zalambra pa crucíalu per un acicaláu puente a la vera un remozáu molín.

Anicíamos l'ascensu per una pista bien ancha, nun hai descansu hasta algamar el Colláu Llaete (1400), nun se ve ni torta y el forru polar nun y lu dexo a naide.

Xiramos a la drecha camín del Mayáu de les Merines, un pasu más y tamos enpericotaos nel picu Pozalón (1744).

Nun se ve ná, pero ná de ná.
Tamos un buen ratu hasta que convencíos damos la vuelta. Dexamos una cuenta pendiente con Niaju.

Enantes de tornar a la Collá Llaete pasamos pel Porru Cervalina (1635).
Alcontríamos una afayaiza cabana onde ponenos a xintar, enantes teníemos apañao un poco de té y dalgun virueganu.

Pela metá la pista xiramos de sópitu a la drecha, caleyamos per un senderu acabante de rozar, ente vuelta y revuelta pasamos per debaxo d'unes maromes d'aceru, va tiempu sirvíen pa baxar mineral de les mines.

Ya crucíamos el puente y poco más alantre tamos en Pio, son les 16:30. caleyamos 15 km y 1080 m. d'ascensu n'apenes 6 hores.

Nel mismísimu desfilaeru de los Beyos tomamos una cerveza, y pa casa qu'entovía ta lexos, dexáronme na mesma a les 19:15, tolos chigres del pueblu pesllaos, tol mundo de folixa nel práu la fiesta.

09-08-2008 Pelacera

ORLE-PURUPINTU-PELACERA-MELORDAÑA-ORLE

Salimos de Xixón a les 8.30, desta vegada vamos pocos, la verdá muy pocos, con un coche basta y sobra, llevalu Victor, pa salir de la mancadura pon una ruta bastante esixente, finamos faciendo 20 km. y 1100 m. de desnivel.

Paramos en Llaviana, son les 9 de la mañana y la confitería entovía ta pesllá. Abrenla entoncenes mismo, col bartolu y el café ente pechu y espalda el día ya paez otra cosa.

Son les 10.10 cuando entamamos a caleyar pelo cimero'l pueblu d'Orle (650) ya resplandiez el sol anque nun pasa de los 14º. Vamos pel Valle del Ríu Mediu a la solombra la biesca. Dexamos-y pasu a un paisanu que baxa col caballo del ramal, aprovechamos pa parar un poco, ya vamos sudando bonamente.

El camín empinase entovía más, llegamos al Mayáu Felguera (1300) seguimos pela drecha hasta algamar el Colláu Friera (1345), ante nuesos güeyos apaecennos unes impresionantes vistes, tras breves momentos de contemplación seguimos camín.

Crucíamos la Xerra los Duernos pela Pasá'l Mosquitón (1428), vamos pela parte riba del monte Purupintu. Intentamos ataxar pero salnos mal, volvemos al camín.

En poco más llegamos al Colláu Cardú (1586) tenemos l'oxetivu a tiru piedra. Descansamos un ratín, una galletina, un tragu d'agua y en diez minutos tamos na picorota, el Picu Pelacera (1629) sol y mosques, putes mosques que nos echen del cumal.

De nuevo nel Colláu Cardú, tiramonos monte abaxo pela Foz de Filispardo, ta mala de baxar pero ensin agua baxase bien, vamos dar al Mayáu Melordaña (1260)

Afayaizu y guapu mayáu, cabanes abondo, unes esfarraplaes pel suelu, otres entovía non.
Sentamonos a xintar, a la vera una bona fonte y al sol, lo que diz que, o nun calentaba muncho o habíemos caleyao poco.

Faense realidá les peores veleés, el mio pan, nunca tan queríu, queo escaecío nel coche, nunca xinté un bocadielllu con tan poco pan.

Baxamos pela Foz de Melordaña, saltando de piedrona en piedrona, menos mal que taba seca del too. En Conforcos topámonos de nuevu cunos montañeros, habíennos adelantáo aprovechando la paradina pa xintar.

Baxamos a la vera'l ríu pel Valle Los Tornos, coxemos l'anchu camín que bien de Pendones y que nos dexa n'Orle, son algo más deles 17.00

Va costandome trabayu esti últimu tramu, voy coxeando, a una de les botes dio-y por tocar los coxones, perdón, el calcañu. Fizose llargu'l camín, además lorenzu apretaba per bien.

Una bona fonte na entrá'l pueblu, casi la dexamos seca. Les botes ya tan nel vertederu... ¿Incinerarales Tinin o charales a l'embalse de Caliao? Quicías les cuelgue de los cables de Lada-Velilla pa espantar a los paxarones de los ecoloxistes.

Finamos como hay que finar estes coses, una cerveza, solo una y colamos enantes que se dierán cuenta que habíemos bebio to l'agua de la fuente.