28-05-2010 Toubkal

IMLIL-AREMD-REFUXU NELTNER-TOUBKAL-AREMD-IMLIL

Miércoles 26:

Nun contábamos con esti madrugón, a les 6:00 en pie, despedímonos de los muleros y desayunamos, subimos les mochiles a un altu, 200 metros picu arriba.

Col cielu azul y pela fresca damos dellos viaxes portando'l material, subímoslo too a la baca, na furgoneta entramos nosotros cinco y los guíes, amás del conductor, dos muyeres, 3 güah.es y otros 2 paisanos, total 15.

Baxamos per una pista, paecía campu a traves, dandu tumbos pa nengún lláu, tan apretuxaos dibemos yera imposible movese. En Boutharar camudamos de vehículu, agora vamos solo nosotros, el conductor y los guíes.

Pel Valle les Roses, cantidaes inxentes de xente per toes les cunetes, paramos en Kelaa M'gouna, un paseín ensin salise de la calle principal, formigueru de xente nel que los unicos raros yeremos nosotros.

Pasamos per Skoura y llegamos a Ourzazat, notase la cercanía'l desiertu. Un guía contratáu pa 15 minutos a un euro por testa, danos abondes esplicaciones na Kahsba de Taourirt, ya fuera tomamos un refrescu casi sufriendo los empellones de la escena duna película que taben rodando.

De súpitu una tormenta d'arena tapez hasta'l sol, baxamos de la furgoneta p'abeluganos nun hotel de luxu, nel enorme comedor tamos nosotros solos. Los Hasanes y el conductor esfumense.

Nestes butacones alredor de la mesa de xuru qu'apigaciamos un puquiñín, ensin noticies de naide pasamos más duna hora, tuvimos qu'apigaciar, la mesa ta tapecía de comida, traen comida a degüellu y l'agua con cuentagotes, certificao, ente que la pides y te la traen pasa una eternidá.

Fartucos de comida fartucamonos d'asfaltu, paramos en Ait Ben Haddou, una güeyadina a la kasbha, ensin llegar a cruciar el ríu, patrimoniu de la humanidá, aquí ya viven del turista, la caleya que conduz al monumentu enllena de tenderetes con toa clase d'artiluxos y los rapaces que se colen nos retratos queriendo cobrar por ello, que poco y falto pa cobrar al rapaz.

Entrugamos-y al conductor, quedennos 5 hores, imposible ta vacilandonos, si llevamos 6 o 7, na ye mentira. Pasamos Agouim y el Tizi-n-Tichka (2260) estirar les pates y xelase les oreyes, intenten vendenos nun se entovía'l que, baxamos pel interminable puertu.

Una imaxen que me arrepentire munchu tiempu nun tener retratao, camiones enllenos de vaques con más vaques na atestá baca. Ya tamos cerca de Marrakech, nun quiero pensar cuanto nos queá pa llegar.

En Ait Ourir coxemos otra carretera y asina camudando de carreteres, qu'allegría, ca vez más empinaes y más estreches, llegamos a Asni, la xente y los coches, los burros y les motos, les bicicletes y otros artiluxos inunden les caleyes y la carretera, asina vamos abriendonos pasu pa finar en Imlil, son les 19:05.

Llevamos llevantaos 13 hores, la mayoría na furgoneta, pa facer unos 300 km. Agora tamos a 1780 m. d'altor, finose l'asfaltu y nun hai nin funicular nin teleféricu nin trastu apaeciu, asina que fuximos como centelles, como queriendo alexanos de la civilización.

Lo que la fueya ponía 45 minutos ficimoslo en 30, el restu'l palabreru taba perbién 300 m. de desnivel y kilometru y mediu, llegamos a Aremd, la casa de los Hasan (1960).

Asina qu'a les 19:35 taba sudando y en camiseta, la ropa venía na mula, la borrina tapecíalo casi que too y la temperatura yera más que fresca, tomamos el té y les galletes na terraza y en cuanto llegarón les mochiles metiémonos pa dientro... y duchamonos.

La primera en condiciones en bastante tiempu, coincidimos cunos maños que ya de vuelta del Toubkal coxerón pronto la cama, a nos traxéronnos, como diz Riestra, un cornete d'esos, imposibles d'acabar.

Xueves 27:

Nun madrugamos, desayunamos pasaes les 8:00, entamamos a caleyar a les 9:00, el día va abriendo anque fríu fai asgaya, baxamos casi hasta'l ríu, riades de xente que vamos dexando atrás.

Paramos nel Marabout de Sidi Chambarouch (2130), santuariu bereber atarraquitáu de tenderetes, mentanto tomamos un té, tornamos les ufiertes de too tipu mercancíes. Saben que vamos tornar pel mismu sitiu.

Seguimos darreu ente mules y turistes, Juan echa a correr, Juan Carlos y Bernardo van apriesa, Riestra y Yo a nuesu ritmu, entá asi vamos adelantrando xente. Llegamos al abelugu Neltner (3208) a les 12:45, hora y media d'adelantu colo previsto na fueya.
11 km. n'apenes 4 hores y 1200 m. de desnivel.

L'abelugu atarraquitáu, mules, muleros, cocineros, guíes y turistes tontorolos, munchos ocidentales y pocos españoles, trás el té y un primer intentu de buscar acomodu, llega la hora de xintar, asina van pasando los díes, desayunar, un té, picar daqué, otru té, xintar, té con galletes, cenar, dormir un poco y entemedies caleyar algo.

Al sol recostíaos contra una paré, yá tamos afechos, paecemos del llugar, mentanto Toraño y Juan Carlos van a estirar les pates nosotros espurrimos les nueses, tres hores dempués cuando tornen tamos na mesma posición, el sol yá calez poco asina que abelugamonos dientro.

Axudíquennos otru cuartu pa dormir, asina esperamos turnu pa cenar, y a dormir. Apenes entamó a escurecer pero fai un fríu que... que fai fríu enforma.

Lo de dormir ye otra cantaera, imposible pa la mayoría, desalmaos dando voces a les 23:00, desasnaos glayando a les 4:00, ronquios y otros soníos corporales aparte.

Vienres 28:

Güeyamos a Hasan na puerta la habitación asina qu'atalantamos la hora de salir, a les 6:40 colos primeros rellugos del sol tamos nes primeres rampes, osea a la puerta'l refuxu nos primeros neveros, la temperatura por debaxo de cero.

Pasamos dalgún tramu xelau, hay tabayones conxelaos y vamos pola solombra, detrás güeyamos otros picos allumaos pol sol, y valle abaxo un mar de ñubes.

Algamamos el Colláu Toubkal, Juan Carlos, Bernardo y Toraño tan llegando al Toubkal Oeste. Abelugaos del aire y faciendo semeyes, imposible les dos coses al empar. Tiramos pal picu, hai un ensame xente.

Vamos abriendonos pasu hasta metenos debaxo estos fierros que coronen el Toubkal (4168), son les 9:40, llevamos 1050 m. y 4 km. en 3 hores y 20.
Baxamos casi que faciendo cola p'atalantar a tanta xente.

Hai dalgún incapacitáu (mental) que baxa casi a llombos del probe guía, nun ye menester subir aqui arribona si enantes nun pisaste una piedra suelta o un trozu ñeve.

N'otres dos hores tamos de vuelta nel refuxu, nin rastru del mal d'altor y ya finamos colos cuatromiles, eso si los pies van quear recalquiaos de tanto baxar, güei van ser 2300 m. de baxada.

Trás del té de rigor toca xintar, tamos bien al solín reparando nel traxín del llugar. Tras xintar, guapamente como ye costume, dexamos les mochiles encima la mula y chamos a caleyar.

Milenta y mil montañeros que suben, entruguen y resoplen, munchos españoles güei.
Paramos nel Sidi Chambourigh teníennos fichaos, imposible colar, imposible mercar ná ensin perder la paciencia.

La cosa tien mala pinta, tras dexar pasar más mules y muleros de los que ye posible qu'haiga en too Marruecos baxamos hasta'l ríu (1887), nun facía falta baxar tanto teniendo la casa no cimero'l pueblu.

Les muyeres y los guah.es glayando, dos infieles dando vueltes pel pueblu, que laberintu de caleyes, menos mal que vinierón a rescatanos.

Llegamos a la casa, un ratín al sol, un té y tras duchase perbien el cornete bien repletu, esti de corderu, pa chupase los deos tamién los de los pies. Afuera ponse frío asina que vamos pa la cama, fuerón 17 km. 1150 p'arriba, 2300 p'abaxo en 7 hores.

Sabadu 29:

Queamos en dar una vuelta pelos alredores, Juan Carlos y Toraño queríen subir otru cumal, los demás diximos d'esperar nun chigre, quien güeyara un chigre o una cerveza, si toles mazanes que tienen les ficierán sidra entós tabamos una selmana entera esperando por ellos.

Renunciarón al plan, asina que dempués del desayunu, tras saldar les deudes, pagar les duches y los refrescos, baxo un sol espléndidu entamamos a caleyar, llevanos Hasan a ver un remexón bien prestosu.

A les 11:00 tamos en Imlil, dempués de hora y media y 260 m de descensu, visitamos una cooperativa de muyeres, faen aceites y manualidades, tras mercar dalgo seguimos de tenderete en tenderete, sortiando vendeores.

Dexámos-yos 2 pares de botes y un sacu dormir, too ello vieyo pa nos, y dalguna camiseta ensin sudar pero puerca como ella sola y una bona propina, eso nos paez. Despedimonos convidándolos, desta vegada servimos-yos nosotros el té.

Nestes tierres del Toubkal fuerón 29 km. en 15 hores y 2620 m. de desnivel.
Palices dieronme de pequenu por brincar encima los llibros, los atles yerén una debilidá, van diez díes esfrutando estes tierres, L'Altu Atlas, destos paisaxes y sobremanera desti paisanaxe.

El cocineru baxa con nos hasta Asni, nosotros ya nun paramos hasta Marrakech, fai calor, dexamos les coses n'habitación y algamamos la terraza ¡pa xintar! na jaima que tienen aquí montá.

Una selmana entera pensando en comer el pasti y va y acabase-yos, vaya putá, pero nun va ser por falta comida.

Damos un paseu per la medina y el zoco, tornen les noticies de la civilización, xuega España y tamién atisbamos a Nadal nes televisiones del zoco, ya non nos paecen tan pesaos, igual los miramos con otros güeyos.

Enantes de cenar vemos la puesta de sol, la primera en 10 díes, dende la terraza del hotel famosu por... tener cerveza.

Domingu 30:

Madruganos anque non muncho, güei vamos tardar en xintar, tras un buen desayunu, ¿como fadrán esti yogur? salimos a dar un paseu, tornamos a la plaza Fna y salimos de la medina pa volver a entrar l'intre. Visitamos les tumbes Saadianes.

Tornamos al hotel, ya tan esperandonos pa dexanos nel aeropuertu, vamos con tiempu de sobra, llegamos a Madrid a les 17:05, buena hora pa entovía tar ensin comer, xintamos daqué, tomamos la primera cerveza en 10 díes y lleemos la prensa mentanto sal el vuelu p'Asturies.

Voi distraidu co'l paisaxe hasta dame de narices cola Cordillera y unes ñubes que los mios güeyos nun son capaces de travesar, el frescu y el mugor desti pais y la riega de noticies, Zapatero ensin dimitir, la crisis mundial y el Uvieu que nun ye a subir...

Taba Fernando esperandonos pa ponenos al día y llevanos a casa a los de la capital y allegaos. Son les 21:00 cuando entamo a llenar la llavadora.
Fuerón dies díes bien aprovechaos, dos d'ellos n'avión, otros dos en coche y el restu asina a güeyu 105 km. caleyando pa subir y baxar unos 6000 m. en 43 hores.

24-05-2010 M'Goun

AROUS-TARKEDDIT-M'GOUN-IRFI N'HAMMOU-RABT

Viaxe de madrugones, el primeru güei pa coyer l'avión a les 7:30, controles de seguridá, esperes, embarques, más controles, más esperes, pasaportes...

Marrakech, salir del aparatu y la sensación d'entrar nun fornu a puntu reventar, subir al land rover y tou tipu de trastos, d'algunos ensin ruedes, a puntu de estrapallase, Alá ye grande ensin dudía.
Dexennos nel Riat y tras xintar allí mesmo, bien y seliquinamente, nun hai quien los apure, y pa que ¿nun tamos de vacaciones?

Salimos a caleyar, hai poca xente, seguro que pol calor que fai, tamos a escasos 200 metros del hotel, na Plaza Jema el Fna patrimoniu oral de la humanidá, adientrámonos nel Zoco, al menos hai solombra, un mundu de sensaciones, golores, colores, ...y apartiando moros.

Caleyamos pelos alredores de la Katubia, mezquita del sieglu XII, llegamos a les muralles de la medina. Ya tamos llicenciaos en tráficu rodau, crucíamos ensin mirar y esfrutamos de la situación: burros, carros, bicicletes, motos, coches, autobuses, camiones y munchos peatones, too bien axitao y ¡ensin acidentes!

A la hora de cenar ta esperandonos Ait Talib, ye l'organizador de tol viaxe, aclaríanos d'alguna dudía y colamos pa la cama, apenes son les 23:00 y ya engordamos unos kilos...

Sabadu 22:

Son les 7 de la mañana, desayunamos y dosis de furgoneta, pasamos de llargu les Cascades d'Ouzoud, nun yera esa nuesa intención. Paramos n'Azilal a 170 km de Marrakech, hora de xintar, son les 11:30 ¿nun ye muy ceo? son les 12:30 pero desto vamos a enteranos mañana.

Siguimos per Ait M'hamed y el interminable primero pa subilu y dempués pa baxalu, Tizi-n-Llisi, llegamos a Ait Bouguemmez, baxamos de la furgoneta y decidimos seguir a pata, llevamos tol día nesi inventu con ruedes, llegamos a lo cimero del pueblu, tamos en Assif Arous (1830).

Dexamos les mochiles y salimos a dar un paseu, siguimos ensin esclarianos col reló, pensando que ya ye tarde, el cielu oscuru ayudó lo suyo, salimos en direición al Jbel Tafenfent, atopámonos con bastantes llugareños, aquina entovía viven de la tierra, fuerón 8 km. y 350 m. de desnivel desde les 16:45 hasta les 20:00, nun se si la hora d'aquí o d'allá.

Tomamos una cococola, mercamos agua asgaya y tornamos al gite d'etape pa cenar. Apenes oscurecio tamos na habitación, 5 colchonetes nel suelu. Algunu ya ta durmiendo cuando lleguen unos vascos que casi nos dan la nueche.

Domingu 23:

Llevantamonos a les 6:00 pa tar caleyando a les 7:00, el día entama frescu y soleyeru, sorprendenos la cantidá d'agua y lo verde que tá too... vamos a la vera'l Riu Ikks güeyando la meyor manera de crucíalu.

Seliquinamente como'l que nun quier vamos ganando altor, dexamos atrás les Bergueries d'Arous, plantaes de trigo y verdures, taremos polos 2400 metros d'altor.

Atalantamos a riestres de mules y muleros, damos cunos israelites, el Inter campeón d'Uropa primera y última noticia de la civilización, llegamos al Colláu Tizi n Aghouri (3377) apenes ye mediudía, agora lo que nos quea ye pa baxo.

Tamos a un tiru piedra del refuxu... y a una docena tiros del M'goun.
Tras un buen descansu atayennos les mules y resopliando Hasam, el cocineru, diznos que vamos muy apriesa, él que vien en náuticos y salio al menos una hora más tarde... Seguimos baxando, ya tamos na meseta de Terkeddit (2900).

Güei ya completamos el plan, 17 km. 1600 m. p'arriba y 500 m. p'abaxo en 6 hores.
Docenes de mules, muleros, cocineros, guíes y nosotros los non siempre tan simpáticos turistes... total un exércitu.

El sol caleznos perbien, atopamos una paré que nos da solombra, dannos el deliciosu té... nun tamos nel paraisu oyemos llegar a los vascos, d'alguna delles acusa a un muleto de perde-y la maleta, y ye que la xente bien al monte con maletes, xigantesques maletes, vimosles meyor na siguiente espedición.

Xintamos al sol, avecinase una tarde de chorraes vascuences, que enteraos taben de too, salimos a estirar les pates pela xigantesca planicie de Terkeddit, el resultau 3 hores, 300 metros de desnivel y 9 km. recorrios.

Entovía llegamos al abelugu con tiempu de sobra pa percatanos de la superioridá destos babayos, los muleros desficierón el camín y revolvíen tolos trastos en busca la maleta... escacía nel hotel.
Ponse bien frío, cenamos toos xuntos bien apretaos dientru'l refuxu a la lluz de los frontales.

La nueche ye movida, la próstata los israelitas y l'aire que xuega cola puerta ficierón llarga la nueche, y eso qu'a les 4:00 tabemos en pie. Riestra durmio al rasu y Bernardo nuna tienda, Juan Carlos, Toraño y Yo no alto l'abelugu, a cuatro metros del suelu.

Llunes 24:

Una bona forma de coyer cariñu a los llunes, a les 4:00 en pie, tras tomar una aspirina y desayunar bonamente, lo malo la lleche y el café en polvo, lo bono el pan, el miel, la mermelada, el zusmiu, el té, la mantega... preparamos sueru pa beber, meyor prevenir el mal d'altor... a les 5:15 tamos a oscures y caleyando.

Colos frontales prendíos na frente, coyemos buen ritmu, la temperatura fresquina, unos 5º y un airucu xélidu, los anoraks, cagunla... van nes mules.

Asina qu'aguantar col gorru, los guantes y el forru polar, una paradina pa ver el riscar y el senderu tapeciu por un neverón, char mano a les piedres y p'arriba.

...y siguimos, otra paradina y col fuelgu recuperáu
entamamos a pisar ñeveros, tolos furaquinos enllenos de mariquites al sol, por fin algamamos la crestería, y finamos nel lexanu cumal.

Tras más duna hora de inacabable crestiar
el M'Goun (4068), son les 9:54, Hasam el guía casi atina, pronostico 5 hores. Paramos lo cabal pa asemeyer el llugar y un pocu más embaxo al resguardu del aire reponemos fuerces.

Baxamos como cohetes, a los guíes entró-ylos la priesa, dalgún asuntu pendiente colos llugareños, baxamos per un inmensu cascayal salpicáu con algún ñeveru.
Ya encauzaos nel valle colamos un buen ratu pisando ñeve.

Y dempués siguimos pel estrechu valle, casi un desfilaeru, espantándolo too ensin facer ná, les muyeres, los guah.es, hasta les oveyes fuxen del demoniu européu.

Paramos al lláu un regatu, sirve-yos pa llavar les verdures y nun momentu tamos xintando, no alto unes figures petrificaes, tras cha-yos una voz baxen con más medrana que vergoña.

Unos rapacinos d'apenes 10 años enllenen un montón de garrafes d'agua y cárguenles nel burrin, Hasan prepára-yos unos bocadiellos que más arriba parense a mirar, pola pinta y les güeyaes que chaben a la comida taben muertos de fame.

Col bandullu enllenu hai qu'algamar un colláu pa camudar de valle y siguir con interminable descensu, Hasan vuelve a desapaecer y l'otru Hasan, el cocineru paezme que nos ta faciendo rodiar.

Ya vamos cansaos, falo por mi, pasamos a la vera los primeros, y últimos camellos que atisbamos nesti viaxe, son nomadas del desiertu, menuos glayios que dan estes muyerones toes de negro al pasar Hasan a la so vera.

Entovía tamos baxando, crucíando milenta y más vegaes el puñeteru regatu, ya entama apaecer el verde, tras crucíar otru ríu inmensu, casi too piedres, l'agua yera poca...

Arribamos a la inesperada meta, tamos en Ifni-n Hammou (2470) el palabreru ponía que llegabemos a 1800 m, son les 15:30 asina que van 10 hores y 20 minutos, 1100 metros p'arriba y 1600 p'abaxo durante 25 llargos kilometros.

Los muleros ya tan aquina, como empresta esta intendencia, una cocacola bien fría, son de mediu llitru, ¡imaxinate! dos cocacoles y media de les qu'acostumes a tomar, duchámonos nestes peculiares instalaciones a que nos tienen avezaos, 10 dirhams, 1 centimu d'euro cuestanos la broma.

Riestra llávase nel ríu y Bernardo casi tien un acidente, cayóse p'atrás dende un metro d'altor, ensin consecuencies, el sustu y unos rasguños... nun fue'l mal d'altor, nin rastru del.

Lleguen los vascos coles sos tonteríes, finase la tranquilidá.
En cenando colos frontales preparaos, aina colamos pa la piltra, Juan Carlos y Yo nuna tienda los demás pue dicise que nunos portalaes.

martes 25:

Espertamos ceo, tal paez que temos n'Asturies, la fresca, la rosá, el ruiu del ríu, el patatal, les mazanes, les nueces... hasta'l paisanu cola fesoria, si nun fuera polos ropaxes... y otres cosiquines perimportantes..

A les 8:00 ya tamos caleyando y el día despexáu, siguimos ríu abaxo, esguilando d'alguna vez y otres faciendo malabarismos pa nun meter les patuques nel agua.

Paramos en Ait Lasommet a la solombra una kasbah, la primera qu'atopamos, lleguen guah.es, muyeres... una curandera o la médico la zona paez la causa de tanta xente.

Salimos delantre los vascos, baxamos pel verde valle, les cases nes pindies lladeres y los guah.es y los rebaños de cabres empericotaos peles peñes.

Subir pa esquivar el ríu y baxar pa evitar los riscos, los guíes esperen pol últimu, que casualidá soi yo, y tras un recodu del camín.... un prestosu remexón, una bona ración de semeyes, Riestra descalzase y...suerte tenemos, l'agua cóla-y col fedor de los pies...

Llevamos dos díes crucíando d'una vera a otra esti regatu, damos cunos ingleses, de Málaga, ni siquiera spanglish falen, entrugennos si falta muncho, 16 díes dando-y a los pies os falten pa llegar al Toubkal.

N'otru recodu apaecen los muleros, allí mesmo nos tiramos pel suelu, mentanto Hasan nos tra-y el té l'otru Hasan prepara la comida, otra panzá y van...

Y un pigacin y a siguir caleyando, ya perdimos muncha altura, notase perbien na fuerza de Llorienzu, anque de sudar na de na, pasamos Ameskar y si el ríu fura nosotros tamién.

Furamos peles Gorges de L'Assif, cueyen l'agua pa una central, llegamos a Amejgag, pueblu grande onde ya nun fuxen de nos, inclusive d'algún mocosu pídenos daqué.

Algamamos Alendoum, una cocacola mentanto Hasan merca pan, que coxonudo tá, güei dempués de díes toca pan blando. Darreu siguimos saltando acequies y trigales hasta dar na Gite d'etape de Rbat.

Y una visión que ya entama a ser idílica, la de los muleros, casi de la familia.

Van 9 hores, anque dos gastamoles pa comer y descansar, 25 km. y 700 metros de desnivel, eso si siempre p'abaxo.

Tras el té y les galletes chiquilin de costume toca acomodase, dase una ducha caliente y dalgunos afeitase, traennos la cena, sopa y apaez el pitu caleya qu'ayeri nun corrio lo bastante, que buenu taba, entovía rellamome.
Y como ya ye costume apenes oscurecio colamos pa la cama.

El que nun haiga tele, nin radio, apenes lluz y el madrugar tolos díes... esta nueche cayo una tormenta, Juan Carlos fue'l más avispáu y punxo les botes a techu.
Nestos díes caleyamos 84 km. en 29 hores, subimos 3350 metros y baxamos 3400, abelugándonos en barracones, refuxios, tiendes de campaña, d'algunu al fresco y ensin ninguna fresca.