entrepicos

ENTREPICOS 5-6-2020 79.1/ 79.3

Tola selmana dando malo y equivocándose, pal vienres danlo bono, a ver si atinen, de momentu vamos tirar pal puertu braña, saliendo alto paez que los cumales son más baxos.

Asina apaecemos na raya (1520) a 3º y con brisina, eso si el cielu más llimpiu que la mio cocina, entamamos a mover les pates xusto a les 8.04, na más comencipiar y ya tenemos que saltar una allambrada, coyemos el camín, un poco embarrau en dirección a la braña la capiya.

Enantes d’algamar la braña  ya tiramos p’arriba, de campera en campera y algún tramu de piornal, a ver cuando, tendrán que ser los chinos, los qu’inventen una desbrozadora pa poner nos cuernos de les vaques, de momentu tendremos que siguir furando.

Vamos regatiando los piornales cuál el meyor messi, claro que de vez en cuando topámonos con un pepe cualésquiera que dexanos temblando. Finamos 9.34 cotcha torres (1868), tiritando caltiennos la brisa, por nun dicir la ventolera, xoserra nun dexa de mirar pala pena la capiya, pero güei tamos siguiendo indicaciones de la fempa y la fempa nun quiso saber na d’ayer, vamos pala llende con tierres casines, a ver como facemos pa nun pisar el reinu de llión que tiennoslo prohibidu el gobiernu la nación.

Anque espelurciaos, darreu siguimos pela pergüapa sienda la hoya pa dar 9.49 na cotcha valverde (1902), cagunros, aprieto tanto’l sombreru que si la brisina me lu arranca adios gargüelu, asina y tou, güau, menudes vistes, como diz l’amiga paloma, güeyase casi tol mio arzobispau que arzobispu destes tierres nomome l’amigu freije, y eso tien más valor que’l más inxustu decretu-llei.

Vamos subiendo fastera arriba, voltiando la mole del torres, cuando tamos protexios de la brisa sentámonos un poco a reponer fuercies.

 trabayu costo llevántase, paez ser que dixe a güelito que siguiera más p’allantre, el casu ye que yo culpo a xoserra, el resultau fue que la vara ablanu atollose y güelito mandome chai una güeyada al muñecu tontu, nun facía falta, ya sabíemos que tabemos pasaos de frenada.

Quisimos atayar, dios que fría taba la piedra, ante’l riesgu seriu d’enriscamientu, media vuelta, unos metros p’abaxo a dar col senderu, nun yera el que yo dicía pero dexonos casi arriba, nel camín de tola vida.

11.03 torres (2104) fueya ign 79.3, lo primero enseña-y a xoserra la canal que nun coyimos.

 dempués face-y a regañadientes la semeya cumbre y tirar p’abaxo a toa leche, redios, un minutu más y riesgu conxelación, claro que tenía razón xoserra, si poneis una chaquetina igual teneís menos fríu, xode dar la razón, asina que nin chaqueta nin osties, del norte semos y de fríu morreremos, pero chaquetes en xunu, non.

Baxando atopamos a 3 llavianenses, los únicos que vamos ver el tola xornada, a les 11.41 tamos nel cotcheu la ventanona (1876) 

saltámonos el picu, güei va ser l’únicu que saltemos, vamos de frente a 12.34 la forcada llagu (1875), el mayu floridu que robonos el gobiernu tamos esfrutándolu un poco güei.

 retorciendo'l pescuezu

a la manzorga, los puertos del contorgán

toca subir al siguiente finxu de la fempa, pal valmartin empobinamonos

12.55 valmartin (1932), l’aire ya más sele y sobretou menos fríu, pasamos 13.17 pela raya valmartín (1822), otru picachu, como nun paez nada tiramos palla, 13.24 porru blancu (1867)

baxamos a la raya fontanietcha (1847) y enfilamos l’arenal (1885).

restolamos nos cacharros tenolóxicos a ver si esti ye de la fempa, peron non, la fempa nun achico espacios, y yo do-yme cuenta cuando veo la baxada qu'esti tenía cavilao rodialu.'

y siguimos baxando

nun se vayan entovía

qu'esto nun tien fondu

14.06 raya bueya (1745) una paraduca pa char un tragu y mirar p’arribona, asina sele, sele, les pates nun dan pa más vamos pasín a pasín pela florida fastera, les vistes ablucantes pa tolos vientos, pero sobremanera cuando torcemos el pescuezu.

 igual ye que tamién recobramos algo de resuellu, que caminar col pescuezu xirau ye permalo y por tantu nun lo facemos, tamos quietinos.

dende'l 14.25 entrepicos (1861)

 tercer finxu, la fempa nun dexanos facer más, asina que’l cascayón, pena’l vientu... pa otra vegada.

Tornamos casi pisando les mesmes flores a la raya bueya

 vamos buscando un sitiu soleyeru y un poco protexiu del aire pa sentar la culera y entamar a morder el bocadillu, que ya va pesando na mochila y ya van a dar les 3.

 reemprendemos camín cuando damos colos montañeros de la mañana, van pala pena’l vientu, a nosotros llamaronnos de la raya que teníe llegao ya’l camión de la cerveza, prioridad ye prioridad.

15.08 pasamos pela fontanietcha (1792)

 nun sabemos como ta l’agua, güei llaurienzu nun nos atizó, 15.19 algamamos la raya valmartin, vamos ya dir contrabaxo, atopamos bonos senderos que empobinennos na bona direción.

charcucos pa refrescar les sueles de les chiruques

Pasamos pelos collaos de la raya col güeyu puestu nuna campera tchena vaques.

 llegamos a les vaques, les vistes del torres son ablucantes.

 como ablucante resulto a partir d’equí el furar pente los piornales.

 

pa finar dando 17.03 na raya.

y ya encargar la cerveza enantes de cruciar la carretera

Camudase y tomar la cerveza remembrando los 13,75 km. 5,44+3,14=8,58 hores, dende los 1480 a los 2104 total 1165 de desnivel,

vel media 1,53, promediu 2,40 total 4563 puntos, que pa eso avisarónnos que tenía llegao el camión.

01-03-2009 soto llorio

SOTO (AGUES) - SOTO (LLORIO)

Otra na frente, magar 15 díes metereolóxicamente bonos, pa güei dan agua abondu, y los bien cabrones van y atinen.

La xente nun ta por salir de los coches, apaez l'autobus y nun tris por arte de maxia va y enllénase.

Paramos na Pola Llaviana a bartolizanos, baxo un auténticu aguaceru apaecemos en Soto d'Agues (435).

Caleyamos pela Ruta de l'Alba, llanu y enllosau paseu, nun ye bon plan que sea asina, asina qu'en pasando la piscifatoría (475) a la primera oportunidá colamos pal barro.

Pola folla y cuesta riba, el paragües nuna man, na otra el palu, y la máquina retratiar na mochila qu'a ca pasu pesá más nel llombu.

El grupu estirase pa nel primer cruce caminos rápido arrexuntase. Nel collau Priella (900) facemos conceyu, tamos a los pies del picu Guanalón, oxetivu de güei, anque nun s'atisbe ná de ná.

Demarro en busca de Josito, coyemos bona ventaxa, hasta que la borrina fai de safety car.

Tornamos a demarrar pero derrapamos na curva colo que volvemos a tar dientro'l pelotón, pero con menos gasolina.

En pelotón damos col pasu, tamos en Buelga Carbaya (950), pel pindiu y esnidiosu fayeu llegamos a la pista que va dexanos en Soto Llorio (350).

Camudaos y a mediu ensuar entamamos otra aventura, vamos en busca del más antiguu llagar d'Asturies, N'Entrialgo xintamos y bebemos, asina finamos una de les rutes más humedes, per dientro y por fora desta Xuntanza.

Dos díes de sol y el miércoles tornamos al monte, ye munchu dicir, en Proaza tras el café tornamos pa casa, rebotaba l'agua dende'l suelu fasta perriba la testa, una esaxeración.

Semeyes cortesia de V.Iglesias.

28-05-2010 Toubkal

IMLIL-AREMD-REFUXU NELTNER-TOUBKAL-AREMD-IMLIL

Miércoles 26:

Nun contábamos con esti madrugón, a les 6:00 en pie, despedímonos de los muleros y desayunamos, subimos les mochiles a un altu, 200 metros picu arriba.

Col cielu azul y pela fresca damos dellos viaxes portando'l material, subímoslo too a la baca, na furgoneta entramos nosotros cinco y los guíes, amás del conductor, dos muyeres, 3 güah.es y otros 2 paisanos, total 15.

Baxamos per una pista, paecía campu a traves, dandu tumbos pa nengún lláu, tan apretuxaos dibemos yera imposible movese. En Boutharar camudamos de vehículu, agora vamos solo nosotros, el conductor y los guíes.

Pel Valle les Roses, cantidaes inxentes de xente per toes les cunetes, paramos en Kelaa M'gouna, un paseín ensin salise de la calle principal, formigueru de xente nel que los unicos raros yeremos nosotros.

Pasamos per Skoura y llegamos a Ourzazat, notase la cercanía'l desiertu. Un guía contratáu pa 15 minutos a un euro por testa, danos abondes esplicaciones na Kahsba de Taourirt, ya fuera tomamos un refrescu casi sufriendo los empellones de la escena duna película que taben rodando.

De súpitu una tormenta d'arena tapez hasta'l sol, baxamos de la furgoneta p'abeluganos nun hotel de luxu, nel enorme comedor tamos nosotros solos. Los Hasanes y el conductor esfumense.

Nestes butacones alredor de la mesa de xuru qu'apigaciamos un puquiñín, ensin noticies de naide pasamos más duna hora, tuvimos qu'apigaciar, la mesa ta tapecía de comida, traen comida a degüellu y l'agua con cuentagotes, certificao, ente que la pides y te la traen pasa una eternidá.

Fartucos de comida fartucamonos d'asfaltu, paramos en Ait Ben Haddou, una güeyadina a la kasbha, ensin llegar a cruciar el ríu, patrimoniu de la humanidá, aquí ya viven del turista, la caleya que conduz al monumentu enllena de tenderetes con toa clase d'artiluxos y los rapaces que se colen nos retratos queriendo cobrar por ello, que poco y falto pa cobrar al rapaz.

Entrugamos-y al conductor, quedennos 5 hores, imposible ta vacilandonos, si llevamos 6 o 7, na ye mentira. Pasamos Agouim y el Tizi-n-Tichka (2260) estirar les pates y xelase les oreyes, intenten vendenos nun se entovía'l que, baxamos pel interminable puertu.

Una imaxen que me arrepentire munchu tiempu nun tener retratao, camiones enllenos de vaques con más vaques na atestá baca. Ya tamos cerca de Marrakech, nun quiero pensar cuanto nos queá pa llegar.

En Ait Ourir coxemos otra carretera y asina camudando de carreteres, qu'allegría, ca vez más empinaes y más estreches, llegamos a Asni, la xente y los coches, los burros y les motos, les bicicletes y otros artiluxos inunden les caleyes y la carretera, asina vamos abriendonos pasu pa finar en Imlil, son les 19:05.

Llevamos llevantaos 13 hores, la mayoría na furgoneta, pa facer unos 300 km. Agora tamos a 1780 m. d'altor, finose l'asfaltu y nun hai nin funicular nin teleféricu nin trastu apaeciu, asina que fuximos como centelles, como queriendo alexanos de la civilización.

Lo que la fueya ponía 45 minutos ficimoslo en 30, el restu'l palabreru taba perbién 300 m. de desnivel y kilometru y mediu, llegamos a Aremd, la casa de los Hasan (1960).

Asina qu'a les 19:35 taba sudando y en camiseta, la ropa venía na mula, la borrina tapecíalo casi que too y la temperatura yera más que fresca, tomamos el té y les galletes na terraza y en cuanto llegarón les mochiles metiémonos pa dientro... y duchamonos.

La primera en condiciones en bastante tiempu, coincidimos cunos maños que ya de vuelta del Toubkal coxerón pronto la cama, a nos traxéronnos, como diz Riestra, un cornete d'esos, imposibles d'acabar.

Xueves 27:

Nun madrugamos, desayunamos pasaes les 8:00, entamamos a caleyar a les 9:00, el día va abriendo anque fríu fai asgaya, baxamos casi hasta'l ríu, riades de xente que vamos dexando atrás.

Paramos nel Marabout de Sidi Chambarouch (2130), santuariu bereber atarraquitáu de tenderetes, mentanto tomamos un té, tornamos les ufiertes de too tipu mercancíes. Saben que vamos tornar pel mismu sitiu.

Seguimos darreu ente mules y turistes, Juan echa a correr, Juan Carlos y Bernardo van apriesa, Riestra y Yo a nuesu ritmu, entá asi vamos adelantrando xente. Llegamos al abelugu Neltner (3208) a les 12:45, hora y media d'adelantu colo previsto na fueya.
11 km. n'apenes 4 hores y 1200 m. de desnivel.

L'abelugu atarraquitáu, mules, muleros, cocineros, guíes y turistes tontorolos, munchos ocidentales y pocos españoles, trás el té y un primer intentu de buscar acomodu, llega la hora de xintar, asina van pasando los díes, desayunar, un té, picar daqué, otru té, xintar, té con galletes, cenar, dormir un poco y entemedies caleyar algo.

Al sol recostíaos contra una paré, yá tamos afechos, paecemos del llugar, mentanto Toraño y Juan Carlos van a estirar les pates nosotros espurrimos les nueses, tres hores dempués cuando tornen tamos na mesma posición, el sol yá calez poco asina que abelugamonos dientro.

Axudíquennos otru cuartu pa dormir, asina esperamos turnu pa cenar, y a dormir. Apenes entamó a escurecer pero fai un fríu que... que fai fríu enforma.

Lo de dormir ye otra cantaera, imposible pa la mayoría, desalmaos dando voces a les 23:00, desasnaos glayando a les 4:00, ronquios y otros soníos corporales aparte.

Vienres 28:

Güeyamos a Hasan na puerta la habitación asina qu'atalantamos la hora de salir, a les 6:40 colos primeros rellugos del sol tamos nes primeres rampes, osea a la puerta'l refuxu nos primeros neveros, la temperatura por debaxo de cero.

Pasamos dalgún tramu xelau, hay tabayones conxelaos y vamos pola solombra, detrás güeyamos otros picos allumaos pol sol, y valle abaxo un mar de ñubes.

Algamamos el Colláu Toubkal, Juan Carlos, Bernardo y Toraño tan llegando al Toubkal Oeste. Abelugaos del aire y faciendo semeyes, imposible les dos coses al empar. Tiramos pal picu, hai un ensame xente.

Vamos abriendonos pasu hasta metenos debaxo estos fierros que coronen el Toubkal (4168), son les 9:40, llevamos 1050 m. y 4 km. en 3 hores y 20.
Baxamos casi que faciendo cola p'atalantar a tanta xente.

Hai dalgún incapacitáu (mental) que baxa casi a llombos del probe guía, nun ye menester subir aqui arribona si enantes nun pisaste una piedra suelta o un trozu ñeve.

N'otres dos hores tamos de vuelta nel refuxu, nin rastru del mal d'altor y ya finamos colos cuatromiles, eso si los pies van quear recalquiaos de tanto baxar, güei van ser 2300 m. de baxada.

Trás del té de rigor toca xintar, tamos bien al solín reparando nel traxín del llugar. Tras xintar, guapamente como ye costume, dexamos les mochiles encima la mula y chamos a caleyar.

Milenta y mil montañeros que suben, entruguen y resoplen, munchos españoles güei.
Paramos nel Sidi Chambourigh teníennos fichaos, imposible colar, imposible mercar ná ensin perder la paciencia.

La cosa tien mala pinta, tras dexar pasar más mules y muleros de los que ye posible qu'haiga en too Marruecos baxamos hasta'l ríu (1887), nun facía falta baxar tanto teniendo la casa no cimero'l pueblu.

Les muyeres y los guah.es glayando, dos infieles dando vueltes pel pueblu, que laberintu de caleyes, menos mal que vinierón a rescatanos.

Llegamos a la casa, un ratín al sol, un té y tras duchase perbien el cornete bien repletu, esti de corderu, pa chupase los deos tamién los de los pies. Afuera ponse frío asina que vamos pa la cama, fuerón 17 km. 1150 p'arriba, 2300 p'abaxo en 7 hores.

Sabadu 29:

Queamos en dar una vuelta pelos alredores, Juan Carlos y Toraño queríen subir otru cumal, los demás diximos d'esperar nun chigre, quien güeyara un chigre o una cerveza, si toles mazanes que tienen les ficierán sidra entós tabamos una selmana entera esperando por ellos.

Renunciarón al plan, asina que dempués del desayunu, tras saldar les deudes, pagar les duches y los refrescos, baxo un sol espléndidu entamamos a caleyar, llevanos Hasan a ver un remexón bien prestosu.

A les 11:00 tamos en Imlil, dempués de hora y media y 260 m de descensu, visitamos una cooperativa de muyeres, faen aceites y manualidades, tras mercar dalgo seguimos de tenderete en tenderete, sortiando vendeores.

Dexámos-yos 2 pares de botes y un sacu dormir, too ello vieyo pa nos, y dalguna camiseta ensin sudar pero puerca como ella sola y una bona propina, eso nos paez. Despedimonos convidándolos, desta vegada servimos-yos nosotros el té.

Nestes tierres del Toubkal fuerón 29 km. en 15 hores y 2620 m. de desnivel.
Palices dieronme de pequenu por brincar encima los llibros, los atles yerén una debilidá, van diez díes esfrutando estes tierres, L'Altu Atlas, destos paisaxes y sobremanera desti paisanaxe.

El cocineru baxa con nos hasta Asni, nosotros ya nun paramos hasta Marrakech, fai calor, dexamos les coses n'habitación y algamamos la terraza ¡pa xintar! na jaima que tienen aquí montá.

Una selmana entera pensando en comer el pasti y va y acabase-yos, vaya putá, pero nun va ser por falta comida.

Damos un paseu per la medina y el zoco, tornen les noticies de la civilización, xuega España y tamién atisbamos a Nadal nes televisiones del zoco, ya non nos paecen tan pesaos, igual los miramos con otros güeyos.

Enantes de cenar vemos la puesta de sol, la primera en 10 díes, dende la terraza del hotel famosu por... tener cerveza.

Domingu 30:

Madruganos anque non muncho, güei vamos tardar en xintar, tras un buen desayunu, ¿como fadrán esti yogur? salimos a dar un paseu, tornamos a la plaza Fna y salimos de la medina pa volver a entrar l'intre. Visitamos les tumbes Saadianes.

Tornamos al hotel, ya tan esperandonos pa dexanos nel aeropuertu, vamos con tiempu de sobra, llegamos a Madrid a les 17:05, buena hora pa entovía tar ensin comer, xintamos daqué, tomamos la primera cerveza en 10 díes y lleemos la prensa mentanto sal el vuelu p'Asturies.

Voi distraidu co'l paisaxe hasta dame de narices cola Cordillera y unes ñubes que los mios güeyos nun son capaces de travesar, el frescu y el mugor desti pais y la riega de noticies, Zapatero ensin dimitir, la crisis mundial y el Uvieu que nun ye a subir...

Taba Fernando esperandonos pa ponenos al día y llevanos a casa a los de la capital y allegaos. Son les 21:00 cuando entamo a llenar la llavadora.
Fuerón dies díes bien aprovechaos, dos d'ellos n'avión, otros dos en coche y el restu asina a güeyu 105 km. caleyando pa subir y baxar unos 6000 m. en 43 hores.