13-02-2009 Turvina

RUENES-CABEZA DESNA-TEYEU-TURVINA-ARANGAS

Pasen a buscame Bernardo, Juan Carlos y Manolo, en Villaviciosa xuntámonos con Paco, Emilio, Riestra y Eduardo, tras el cafetín y la merca del pan colamos pa Ruenes (300) na Peñamellera Alta.

Falamos colos paisanos del llugar, tan asoleyándose, vamos tener un buen día dicennos, será'l primeru en va munchu tiempu.

Ya son les 11:30 cuando entamamos a caleyar, el desnivel ye perbonu, les goterones de sudu dexen permoyáu el camín carreteru, que fina a la vera dunos xigantes molinos, a non... son torres d'alta tensión, damos col senderu que se retuerce, tantes vueltes y revueltes anque lu faigan más llevaderu, sicoloxicamente a mi siéntame permal.

Dexamos de soslayu les Mines de Cerezu (600) deles qu'extrayíen l'almagre (mineral ferroginosu), les maromes d'aceru desperdigaes pel suelu faennos imaxinar el trabayu que costaba ganar unes perruques.

Na braña La H.orada (1050) na vega asina nomá comencipíamos a pisar ñeve, les vistes son ablucantes, l'Urriellu casi a un saltu y si saltes pal otru lláu un buen coscorrón na vera'l Cantábricu.

Paramos apenes pa reponer el resuellu, a la drecha dexamos el cumal del H.aba, l'últimu finxu de l'anterior vegada per estos andurriales de la Sierra del Cuera.

Güei xiramos a la manzorga, camín del Cabezu Desna (1226) nun santiamén tamos allá arribona empericotaos, tras les semeyes de costume baxamos con cuidau onde asitiar los pies... que terrén tan malu y... ñevau.

Agora toca-y al Picu Teyeu (1220) y d'aqui, soslayando los ñeveros y los h.ous, pal Turvina, metímonos en toos, eso me paez. ¡y nun yeren pocos!

Ensin rastru de les ñubes, los Picos ñevaos y el Cantábricu como un platu, enpericotaos nel Turvina (1316) con sos dos picachos, d'uno a otru y vuelta a empezar.
La curiosa escultura y les ablucantes güeyaes...

La sensación de tar colos picos a la espalda cuna ñeva d'órdagu, y la playa de frente con l'ablucante día de sol, nun atopo pallabres, atopamos les fuercíes pa colar, la siguiente estación el mayau Piedra l'Osu (1080).

Cola espalda na muria duna cabana, los bocadiellos bien asitiaos nes manes, y la bota col vino de la manchega cosecha de Paco como lloca de mano en mano y les oveyes xaldes siguen paciendo ensin inmutase ante la visita de tantes y tan importantes personalidaes.

Siguiendo'l cercau a la drecha hasta dar cola portiella que da pasu a la Canal del Gobiu, llargu y pronunciau descensu pasando pela fuente Devaniegu. A les 18:00 tamos nes Arangues (355) a la vera'l texu y la consiguiente ilesia, primero son los dioses primeros.

Mentanto refrescamos el gargüelu, resecu pol soleau anque non calurosu día, llamamos a un taxi pa dir hasta los coches, curiosu dialogu, un guah.e entruga-y a la bisgüela, ¿cuantos años tienes? 98 ¿y tu? yo 5, ¿entonces cuántos te saco? ¡99! nun se cuál de los dos cuerre más.

Ensin más pa casina, una ducha y a trabayar, xusto, muy xustu de tiempu. Fuerón 7 hores caleyando pa facer 15 km. y 1270 m. de desnivel.

30-01-2009 Cuetu Millaro

MILLARO-COLLAU FARRAMEDAL-ALTU SEXTEOS-LLANU'L PRADO-MILLARO

Llevo a Paco fasta Uvieu, tan esperendonos Juan Carlos y Bernardo, en Mieres ya tan Eduardo y Riestra col cafetín.

Vamos pa Castiella atraviesando'l Puertu Payares, tras mercar el pan en Busdongo allegámonos a Millaró (1370) dexamos los coches nes afueres, la ñeve impidionos metelu dientro'l pueblu.

Nun hai un alma, solo un solitariu perru con ganes de compañá, el termómetru marca 6º, pero l'aire fai que paezcan una docena menos. Tras poner polaines, gorros, guantes y guardar los paragües, l'airón fa-ylos inútiles, entamamos a pisar la ñeve.Colamos pel pueblu arriba fasta coyer una pista a la drecha, enseguía llegamos al Colláu Carrozal (1530), seguimos darreu anque nun se güeye na. Dende'l Colláu Farramedal (1705) atisbamos los alredores de Carmenes, pasamos averaos al Picu Camino, ente la ñeve y la borrina vemoslo too blanco, asina y too siguimos col plan.

Nun destos cercaos modernos, con patiu central y ensin techu paramos un ratu, como sigue cayéndonos la ñeve perriba la tiesta enfilamos pa la cumbrera, a falta de camín en llínea reuta.
Solo fuerón 150 m. de desnivel, asomase a la crestería y casi que salir volando, y anque la ñeve te blanda nun apetez ná baxar dando cucurrabucos.

Asina que media vuelta, anque temos a un palpu, güei a güeyu nun se pue midir, del oxetivu, Braña Caballo o Cuetu Millaró.
Baxamos pela Muria del Sapu (1900) y nos Llanos del Prado atopamos un refuxiu onde abelluganos, firmamos nel llibru de visites y tras barrer la cabana colamos lladera abaxo.

Dende'l Colláu Carrozal (1507) ya atisbamos el pueblu, la ventisca fai dañu na cara.
Un perru guardian a cambiu dunes migayines danos el beneplácitu pa xintar a techu baxo'l tendexón duna casa.

Metémonos con too nos coches pa baxar fasta Busdongo, entramos na estación y bien pegainos a los radiadores camudamonos mentanto calecemos un poco.

Con ñeve, airón y borrina, en cuatro hores caleyamos casi que 11 km. y subimos un desnivel de 935 m.
Finamos viendo'l telediariu nel chigre del Altu Payares. Ensin priesa baxamos el Puertu.

02-01-2009 Atambos

LA FELGUERINA-COLLAU LA CANALINA-ATAMBOS-LA FELGUERINA

Llego a Pola Llaviana y como ya ye costume los chigres tan pechaos, nesti pueblu nun madruga naide, enseguía lleguen Emilio, Josito, Jordi y Luis Enrique, desayunamos con calma na confitería Conchi, un llugar perafayaizu onde los haiga.

Güei costome trabayu salir dela cama, pero ya lo tomo como asuntu personal, o termino cola gripe o termina ella conmigo.

Aparcamos los carruajes, si si carruajes, más de 200 caballos tiren de nosotros, na entrá la Felguerina (760), hay nieve na carretera.

Entamamos la caminata cuesta baxo, mal comienzu, nalgún momentu habrá que recuperalo, la sensación dura poco, enseguía se empina'l camín, ye la segunda vegada que paso por esta pista y la segunda que ta xelá.
Paramos a poner les raquetes, que na mochila no faen más qu'estorbar.

El día ta soleáu anque frío fai asgaya, salimos al colláu Vallegu (1500), el cielu azul, la ñeve blanca, prestoses güeyaes pa tolos alredores...el esfuerzu recompensau ente tosíu y estornudu.

Ñeve abondo, les raquetes amortizaes, nel colláu La Canalina (1563) xiramos pala manzorga, dudíamos si seguir, la ñeve ye xelu, vese el fondu pero muy abaxo, neso Josito ya ta a media fastera, d'alguna pallabra malsonante y p'alantre, con muchu cuidadín y d'algun qu'otru cagamentu.

Salímos al sol, respiramos profundamente, miramos p'atrás y p'abaxo, falta garrotazos tenemos, tamos nel colláu Atambos (1623) queanos esguilar al picu, Jordi entierrase na ñeve, entrugamos-i si ta faciendo'l metrotren...

Cumplía la misión de güey. Yerá hechai una güeya al buzón, lleva mal el pasu del tiempu, escasu añu de vida y ta apagáu, ensín brillu, murniu, tamos un buen ratu, afayaizu llugar... calienta'l sol, xintamos seliquinamente, buen sitiu pa dexar la gripe pero na, la condená quier seguir comigo.

Baxamos colo vista puesta nel Pandu la Cerra, vamos acortíar un buen trechu, la ñeve ta caprichosa, agora blanda, agora dura, agora... Nuna deles munches ocasiones que nos fundíamos más p'arriba les rodielles subeseme'l xemelu... una molestía más.

Vemos les lluces del pueblu a lo lexos, faisenos de nueche. Nel chigre (centru social) al calor dela estufa chamos un buen ratu entreteníos en plática colos paisanos, ya de nueche cerrá, apalpando los coches, camudamonos apriesa -facía frío- y a tientes na más asoluta intimidá.

Caleyamos tol día pa facer 12 km. ente la ñeve.
Al agravamientu griposu xuntose-i una rotura fibrilar nel xemelu.

21-12-2008 Col.la Palacios

FELECHOSA-FOCES DEL PINO-COL.LA PANDU-COL.LA PALACIOS-PUENTE LA MUÑECA-FELECHOSA

En Xixón ni frío ni calor, a cero grados esperando, mentanto a dalguna se-y poníen les oreyes roxes a los que somos puntuales taben poniendosenos tieses pol frío.
Vamos en dos coches hasta Felechosa; Victor, Victor I, Ana P, Josito, Cundi, Ana B y Montse, dexamos el coche aparcáu ente la ñeve.

Desayunamos y colamos direición al Pino, enantes un paisanu tomanos por llocos y casi nos ruega que desistamos "si quereis ñeve subir al puertu"

Cuesta trabayu caltenese en pie, agarraos a les muries y tropezando colos coches llegamos al Pino, milagrosamente ensin posar la culera nel suelu. Dexamos l'asfaltu, ye menos resbaliosu el camín.

Cuanta más ñeve hay más ropa sobra, curioso, igual ye polo pindio'l camín. La ñeve y la cantidá d'agua que baxa faen que les Foces tean espectáculares.

Na penumbra de les Foces vamos casi a ciegues, salimos nes Campes (1050) y cieganos el sol.
El camín morrió, ta enterráu baxo un metru ñeve, asina que tiramos por onde bonamente poemos.

Vamos pol valle del Pedrosu p'arriba, nel cielu ni una triste nube, atrás queen atapaes pola ñeve les cabanes del Pedrosu.

Frente a nos apaeznos el Retriñón, a la drecha vamos dexando Peña Reonda, algamamos la Col.la Palacios (1461), la vista pierdese ente milenta y más picos, pa mio paecer destaquen el Estorbín, el Torres y Peña Mea.

Agradiezse el falsu llanu, ente pisaes de llobos llegamos al Col.láu Pandos (1472) xintamos en corro y de pie, discurriendo'l siguiente pasu.

Tamos nos pies de Peña Melera, meyor dexala pa otra ocasión, nun traemos los medios téunicos necesarios...

Tras dudiar unos instantes por mor del estáu de la ñeve tiramonos p'abaxo seliquinamente con esmeru en nun resbaliar, nun vaya paeceí mal a dalgún que lu alantres.

El empeñu en nun resbaliar tresformase nel deseu de nun quear enterrau.
Faise imposible esi deseu, más p'arriba de la cintura nos empozamos, eso los más altos.
Llegamos a los Gallos (1220) ensin atopar ninguna sebe, toes taben atapes pola ñeve.

Agora metemonos na biesca, pol pindiu, embarráu y resbaliosu senderu, pegaos a la paré que fai la llabor d'escuela de escalada.
Llegamos a la carretera, crucíamosla a la altura del Puente la Muñeca pa seguir pel camín hasta Felechosa (650).

En metá'l pueblu nos camudamos, chamos-y voz al paisanu que nos aconseyo pela mañana, diximos-y lo que ficimos, percatose que tabemos bien (fisicamente) y gruño algo paecío "refalfiaos ye lo que tais... si vos lo mandarán..."

Asina transcurrio la xornada, caleyando 14.3 km. pa xintar de pie ente la ñeve y finar tomando un café a les 17.00 nel mismu sitiu que lu habíemos tomao a les 10.10.
Coses de los Meniskos.