24-05-2008 Atambos

PUENTE WAMBA-LLAGU UBALES-ATAMBOS-SOTU CASU

Salimos de Viesques a les 8.00, en Cabañaquinta paramos a desayunar y d'ahi a Puente Wamba na parte lleonesa del Puertu San Isidro.

Dicen qu'en Lleón non llueve...baxamos del autobus en Puente Wamba (1450) y paecía, sino fuera porque yeren les 10.20 de la mañana y facía unos 12º de temperatura que habíemos llegao a una deses fiestes en que te tiren calderaos d'agua dende les ventanes.

Vamos subíendo pol camín bien marcáu, colos paragües ganandose'l sueldu, atopamos unos guardies forestales que nos entrugen onde vamos con esti día, llegamos al colláu Acebal (1711), apenes nos vemos ente nos, baxamos ente los piornos al Llagu Ubales (1687).

Seguimos la ruta, nel colláu La Canalina (1563) dalgunos seguimos p'abaxo, pola niebla y tamién porque yera más comodo, pero na, hay que dar la vuelta y eso ya jode más.

Torcenos a la drecha pol crestón del picu Cortegerón, la borrina ca vez más espesa fai que nos arrexuntemos tos... asina fuimos hasta divisar la collá Atambos.

Paez que quier aclariar, esguilamos al picu Atambos (1712) como formiguines, caún por un lláu, plantamos el buzón... nieva, graniza, sal el sol... amplía sesión de semeyes.

¡YE GUAPU E!

Baxamos atisbando de regüeyu'l picu ya coronau, bien coronau pol (nesos momentos) buzón más nuevu del mundu. Aprovechanos pa xintar nun delos escasos momentos en que non llueve, tamos nuevamente na Collá Atambos.

Xiramos a la manzorga fastera p'abaxo, faciendo equilibrios na alfombra verde y tupía, pasamos pol mayáu La Cabritera (1450) vamos brincando la riega d'un llau a otru. Al llegar al mayaú Gavilán (1180) comencipía la tormenta llétrica, yera lo único que nos faltaba, bueno no, no nos soplo'l airón.

Pol camín anchu y bien embarráu llegamos a Sotu (622), entovía no son les 18.00 y dexó de llover, camudamonos y vamos hasta Campu Casu onde buscamos un llugar afayaizu pa dar bona cuenta deles viandes que llevabemos y dela sidra del llugar.

A les 22.00 toi en casa y aquí entama otra hestoria.

27-04-2008 Carba Valseco

TUIZA RIBA-PICU CASTIELLU-CARBA VALSECO-L.LINDES

En Xixón a les 8, magar paranos en Mieres a tomar un café la camionera llevanos hasta Tuíza Riba (1230), al pasar güeyamos les obrones del Ave, ente l'arte al volante y les obres llegamos más que mediu amoriaos.

Comencipíamos a caleyar, el día paez de branu, algamamos el colláu'l Visu (1560) que separta peña Foxón de peña Castiellu.

Bones vistes pa Peña Ubiña, Josito discurre que son meyores dende'l cumal de Peña Castiellu (1683), asi que colamos casi toos detrás d'él. Tenía razón, les vistes y el día acoxonantes, casi tanto como empericotase allá arribona.

Tornamos al colláu'l Visu, recoyemos les mochiles, que bien se va ensín elles, ensín les mochiles, y a otres poquitines que quedáronse tomando'l sol, darreu siguimos col caleyar.

La subía ye tendía pero nun dexa de ser cuesta, enseguía güeyamos la Carba Valseco (1874) enantes d'algamala crucíamos dalgún ñeveru que valnos pa enrear un poco, anque haiga poca ñeve ye asgaya pa coyer una bona pingaura.

Vamos esguilando pela pena, el día va tornandose gris, la borrina va ganandonos terrén, na picorota mentanto van llegando los más arrezagaos yantámonos unos bonos bocáos, inda ye tempranu, malapenes les 2.

Colamos pal colláu del Trave, debaxo tan los Puertos d'Agüeria, en primer planu'l L.lagu, sentamonos na oriella, xintamos adulces, bono yo güeyo la estampa y retrato la escena, la borrina aprovecho bien esta tregua, ya ta enriba de nos.

Caleyamos pente la nublina casi a ciegues, val más parase, cha-y una güeya al gps y face-y un poco de casu al dichosu cacharru. En poco tiempu tamos reblincando duna oriella o otra hasta qu'entama a facer honor al so nome, la Foix Grande, ya nun hai modu de brincala ensin moyar los calcaños.

La última vegada dalgunos descalzáronse, otros con más paciencia
atopamos un tueru sobre'l que facer equilibrios.

Subimos pela biesca fasta'l colláu Candana (1261), darreu baxamos pel monte Gorbizal, enllenu de fayes, el camín ca vegada más anchu y con más barro déxanos to puercos en L.lindes (930).

Magar asimilar qu'en Bárzana nun hai abiertu nengún chigre allegamonos a Aciera onde esfrutamos duna bona sidra y dunos meyores chorizos que nos dexen un bon sabor de boca pa entamar la venidera xuntanza.

Asina a bote pronto, fuerón 17 km. con 700 metros p'arriba y otros 1000 p'abaxo per estes tierres de L.lena y Quirós.

15-03-2008 Vescoba

SAN ROMAN-COLLAU AMIEVA-PORRU GOBEZANOS-VISCOBA-VIS-PUENTE DOBRA

Queamos en Xixón a les 8.00, el día ta desapacible, ya no son les 8.00.
Una bona trona fizó güei d'espertador.

En Cangues d'Onis el cafetín al calor de la estufa, el fríu que facía fuera, el agua que cayía... y si nun fuera bastante, la carretera p'Amieva atopamosla cortá por un argayu, to invitaba a metese nun chigre a esperar la hora de xintar.

Pero cuando un tien ganes de folixa nun hay na que lu pare, vuelta trás a buscar otra carretera, paecía que tabemos na misma playa, llovía a mares... el autobús pasó rascando muries hasta llegar a San Roman (650) enxamás pienso dir col mio coche.

Baxamos del autobús y milagru de San Román, nun llovía, la temperatura taba agradable, unos 12º, asina que ya yerén les 11.00 cuando colamos carreterina arriba hasta algamar el Colláu Amieva (720).

Aquina arroxarón tonelaes d'formigón pa nun emporquiar los zapatos -seguro que fue la conseyería- tan na idea que fixeron un mirador, habrá que recorda-y al conseyeru de turnu que nun se dexa basura nel monte.

Entámamos a subir, la verdá lo único que fue p'abaxo fue'l posase del autocar, el grupu va esparciéndose, pasamos pela Vo de Timarru (1105) y esguilamos al Picu Gobezanos (1107).

Nesti llugar y nesti precisu momentu comencipía a granizar, pa seguir lloviendo bona parte del día.
Crestíamos pela Sierra d'Amieva alcontríando a nuesu pasu el Picu Porrón (1113), el Viscoba (1083), la Porra Viscoba (1063).

Dexá de llover, momentu qu'aprovechamos pa sentanos un ratiquín, más que na pa xintar y falar tranquilamente, el sol paez que quier sacanos la humedá.

Esguilamos al Porru Cantu La Cueva (1067), tras les semeyes de rigor entamamos un vertixinosu descensu ensin güeyar bien onde se posaben los pies; piedres, gorbizos y resbalioses yerbes nun son lo meyor pa caltener el equilibriu (nun falamos del mental).

Nel Collau Sañín (708) alcontríamos a Toni, Ana y tolos que dierón la vuelta na primera cume.
Pela pista ancha y con buen firme llegamos a Vis (330). Pol camín vieyu... y pindíu baxamos ente la biesca hasta'l ríu Dobra.

Vamos a la vera'l ríu hasta que lu crucíamos pol Puente Vieyu, damos nel chigre que hay en Puente Dobra, buen llugar pa camudase de ropa y refrescar el gargüelu.

Tras caleyar 16,5 km. 933 m. de subía y 1400 m. de baxada nunes cuantes hores, pasar frío, moyase y sudar abondo nun quea más que metese nel autobus y llegar a casina, querida casina.

13-02-2008 Atambos

LA FELGUERINA-ATAMBOS-VISU LA GRANDE-CUERVU-LA FELGUERINA

Tras dexar el coche en Xixón, vamos con Victor hasta Pola Llaviana onde desayunamos bonamente, somos pocos, Victor, Montse, Jordi y Cundi los que nos aventuramos en busca d'un picu pa plantar el nuesu buzón de cumes, el primeru por agora.

Bien desayunaos colamos hasta La Felguerina (760), el día ta nídiu y fríu, apenes s'alcancen los 5º. Comencipiar y equivocase tolo mesmo, nel primer cruce como cabres tos p'arriba, yera p'abaxo, na fuerón 200 metros.

Tan formigonando la pista, fea costume agora que ya no queen ganaeros, coxemosla toa p'arriba, faise afanosa.

La ñeve que tamos pisando enseguía pasa a ser xelu, neses condiciones Jordi va dexandonos atrás, esperanos cola cámara retratar emboscáu nel colláu Vallegu (1500).
Ya ta menos pindio, llegamos a la collá La Canalina (1563).

El paisaxe ye acongoxante, picos y más picos que paecen imposibles de algamar, la ñeve dura, casi xelu fainos renunciar al primer finxu, el Berezosu. Con pies de plomo vamos rodíandolu pola manzorga.

Con cuidadín llegamos a la collá Atambos (1623) tase bien, bona compaña, buenes vistes, la temperatura agradable, pero llamanos el deber...

Empicotaos nel Atambos (1711) buenes vistes, notable altu, un firme candidatu.
Los tres que tenía como bonos collacios, ficieronme trampa, habíen subio sin les mochiles, agora daben la vuelta a por elles.

Victor, creeílo ye cierto, propon parase a xintar, negamonos en reondo y ponemos el güeyu nel siguiente oxetivu, el Visu la Grande (1708) d'aquí entamamos pal Collatín dela Xistra (1517) onde pa da-i gustu a Victor sentamonos a xintar.

Col pesu camudau deles mochiles a les barrigues el picu Cuervu (1582) paeznos una tachuelina insinificante. Baxamos pol Cantil arrancando les escobes coles pates.

Nel prestosu, porque taba buen día, mayáu Gallera (1250) damos cola pista, tamién tan formigonandola, col cementu frescu fue díficil no cayer na tentación de dexar la güella.

Mirabemos más p'atrás que p'alantre, güeyando'l picu que de xuru vamos adoutar como nuesu.

Ya na Felguerina, recibenos el mismu perrucu que nos había despedio pola mañana.
Ya camudaos tomamos la cervecina en Riosecu, d'aquí pa Xixón y pa casa.

Fue un día soleáu y de bona temperatura, caleyamos 17 km. 1300 m. de desnivel en 7 hores y media.