15-03-2008 Vescoba

SAN ROMAN-COLLAU AMIEVA-PORRU GOBEZANOS-VISCOBA-VIS-PUENTE DOBRA

Queamos en Xixón a les 8.00, el día ta desapacible, ya no son les 8.00.
Una bona trona fizó güei d'espertador.

En Cangues d'Onis el cafetín al calor de la estufa, el fríu que facía fuera, el agua que cayía... y si nun fuera bastante, la carretera p'Amieva atopamosla cortá por un argayu, to invitaba a metese nun chigre a esperar la hora de xintar.

Pero cuando un tien ganes de folixa nun hay na que lu pare, vuelta trás a buscar otra carretera, paecía que tabemos na misma playa, llovía a mares... el autobús pasó rascando muries hasta llegar a San Roman (650) enxamás pienso dir col mio coche.

Baxamos del autobús y milagru de San Román, nun llovía, la temperatura taba agradable, unos 12º, asina que ya yerén les 11.00 cuando colamos carreterina arriba hasta algamar el Colláu Amieva (720).

Aquina arroxarón tonelaes d'formigón pa nun emporquiar los zapatos -seguro que fue la conseyería- tan na idea que fixeron un mirador, habrá que recorda-y al conseyeru de turnu que nun se dexa basura nel monte.

Entámamos a subir, la verdá lo único que fue p'abaxo fue'l posase del autocar, el grupu va esparciéndose, pasamos pela Vo de Timarru (1105) y esguilamos al Picu Gobezanos (1107).

Nesti llugar y nesti precisu momentu comencipía a granizar, pa seguir lloviendo bona parte del día.
Crestíamos pela Sierra d'Amieva alcontríando a nuesu pasu el Picu Porrón (1113), el Viscoba (1083), la Porra Viscoba (1063).

Dexá de llover, momentu qu'aprovechamos pa sentanos un ratiquín, más que na pa xintar y falar tranquilamente, el sol paez que quier sacanos la humedá.

Esguilamos al Porru Cantu La Cueva (1067), tras les semeyes de rigor entamamos un vertixinosu descensu ensin güeyar bien onde se posaben los pies; piedres, gorbizos y resbalioses yerbes nun son lo meyor pa caltener el equilibriu (nun falamos del mental).

Nel Collau Sañín (708) alcontríamos a Toni, Ana y tolos que dierón la vuelta na primera cume.
Pela pista ancha y con buen firme llegamos a Vis (330). Pol camín vieyu... y pindíu baxamos ente la biesca hasta'l ríu Dobra.

Vamos a la vera'l ríu hasta que lu crucíamos pol Puente Vieyu, damos nel chigre que hay en Puente Dobra, buen llugar pa camudase de ropa y refrescar el gargüelu.

Tras caleyar 16,5 km. 933 m. de subía y 1400 m. de baxada nunes cuantes hores, pasar frío, moyase y sudar abondo nun quea más que metese nel autobus y llegar a casina, querida casina.

13-02-2008 Atambos

LA FELGUERINA-ATAMBOS-VISU LA GRANDE-CUERVU-LA FELGUERINA

Tras dexar el coche en Xixón, vamos con Victor hasta Pola Llaviana onde desayunamos bonamente, somos pocos, Victor, Montse, Jordi y Cundi los que nos aventuramos en busca d'un picu pa plantar el nuesu buzón de cumes, el primeru por agora.

Bien desayunaos colamos hasta La Felguerina (760), el día ta nídiu y fríu, apenes s'alcancen los 5º. Comencipiar y equivocase tolo mesmo, nel primer cruce como cabres tos p'arriba, yera p'abaxo, na fuerón 200 metros.

Tan formigonando la pista, fea costume agora que ya no queen ganaeros, coxemosla toa p'arriba, faise afanosa.

La ñeve que tamos pisando enseguía pasa a ser xelu, neses condiciones Jordi va dexandonos atrás, esperanos cola cámara retratar emboscáu nel colláu Vallegu (1500).
Ya ta menos pindio, llegamos a la collá La Canalina (1563).

El paisaxe ye acongoxante, picos y más picos que paecen imposibles de algamar, la ñeve dura, casi xelu fainos renunciar al primer finxu, el Berezosu. Con pies de plomo vamos rodíandolu pola manzorga.

Con cuidadín llegamos a la collá Atambos (1623) tase bien, bona compaña, buenes vistes, la temperatura agradable, pero llamanos el deber...

Empicotaos nel Atambos (1711) buenes vistes, notable altu, un firme candidatu.
Los tres que tenía como bonos collacios, ficieronme trampa, habíen subio sin les mochiles, agora daben la vuelta a por elles.

Victor, creeílo ye cierto, propon parase a xintar, negamonos en reondo y ponemos el güeyu nel siguiente oxetivu, el Visu la Grande (1708) d'aquí entamamos pal Collatín dela Xistra (1517) onde pa da-i gustu a Victor sentamonos a xintar.

Col pesu camudau deles mochiles a les barrigues el picu Cuervu (1582) paeznos una tachuelina insinificante. Baxamos pol Cantil arrancando les escobes coles pates.

Nel prestosu, porque taba buen día, mayáu Gallera (1250) damos cola pista, tamién tan formigonandola, col cementu frescu fue díficil no cayer na tentación de dexar la güella.

Mirabemos más p'atrás que p'alantre, güeyando'l picu que de xuru vamos adoutar como nuesu.

Ya na Felguerina, recibenos el mismu perrucu que nos había despedio pola mañana.
Ya camudaos tomamos la cervecina en Riosecu, d'aquí pa Xixón y pa casa.

Fue un día soleáu y de bona temperatura, caleyamos 17 km. 1300 m. de desnivel en 7 hores y media.

23-12-2007 Busllar

COLLA ARNICIU-BUSLLAR-PRIERES-GOBEZANES

Tras dir fasta Xixón a coyer l'autobus colamos pa Llaviana, na Pola desayunamos perbién. D'equí a la Collá Arniciu ye un momentín... Salir escopetaos del autocar y char el frenu de mano, los glayíos yeren pa facer la semeya la salía.

Fechos los deberes colamos a la manzorga, alcontríamos cabanes abondo, munches d'elles esfarraplaes pel suelu. Cuando el tarrén entama a ponese pindiu la xente entama a desperdigase, ¡y les conversaciones van apagandose!

Na Collá Busllar (1070) cada menisku busca el so camín, pa finar arrepegando peles piedres fasta empicotase nel cumal de La Busllar (1234). Un montón de semeyes dempués entamamos el descensu, a un llau dexamos el valle d'Orllé, al otru'l pantanu de Tañes.

Nuavamente na Collá Busllar tiramos a la manzorga, fasta'l Colláu La Trapa (1024) ente árgomes y munchos senderos algamamos una pista que nos dexa en Prieres (720) pergüapu y remozáu pueblu casín, entretenemonos sortiando una docena abundante de perros con toles tonalidaes posibles de lladrios.

Na segunda curva dexamos l'asfaltu pa garrar el Camín de la Peña, sortiando l'abismu llegamos a Gobezanes, bueno casi, impidionoslo el barro, la fame y la presencia de l'autobus abaxo na carretera.

Damos-y final a esta caminata de poques hores, 8 km. 318 m. p'arriba y 650 p'abaxo, el día nídiu, el cielu del Uvieu cerráu y una agradable temperatura.
La cosa complicase enforma, llegamos a xintar a La Carasca y recibenos un xentíu alborotáu, eso si con botelles de sidra na mano, y munches caxes vacíes nel suelu, nun dábemos a bastu a saludar.

En dando bona cuenta de la sidra, nun dexamos de facer lo mesmo cola fabada y el cabritu, metiendo a empuxones l'arroz con lleche. Finamos cola grandiosa presentación del nuesu buzón de cumes y el compromisu de dir toos a cincalu nuna cume entovía sin escoyer.

14-12-2007 Corbellusu

SOTO D'AGUES-MAYAU TRAPA-CORBELLUSU-ARROZ-MAYAU COGULLU-SOTO D'AGUES

Queamos a almorzar nel Berrón a les 8:30, Riestra, Miguel, Maite, Bernardo, Juan Carlos y Yo, empovinamonos pela autovía minera hasta dexar los coches nel amplísimu aparcamientu de Soto D'Agues (420).

En plenu parque natural, nun sabía qu'equival a parque de formigón, caleyamos pela aberrantemente remozada Ruta L'Alba... cuanto meyor cuando se conocía como les Foces del Llaímo.Meyor acondicionada que la mayor parte de les cais de les meyores ciudaes del mundu mundial, tonelaes de formigón nun espaciu que prohibe la presencia de cualesquier persona en gran parte del so espaciu.

Asina lu quieren conservar, trayendo autocares enllenos de turistes que nun soporten emporcase los zapatos.

Nosotros plantegamonos otres metes, mientrás nun deamos co la tiesta nos molinos de vientu...caleyaremos cola tiesta alta.

Nun paramos de caleyar, nun vamos parar d'escribir, en pasando les mines, a l'altor del Pontón de Retortoriu (500) xiramos a la drecha per una empiná pista, los goterones de sudor nun ayuden a fraguar el formigón.

Subimos pela Cuesta Pandu p'algamar el Colláu Trapa (950) guapu y afayaizu llugar con cabanes inda en bon estáu.

Baxamos separtando árgomes pela Foz del Corbellusu, dura poco está sensación, camudamosla enseguía pola de separtar cotoyes mentando esguilamos fasta empericotanos nel cumal del Corbellusu (1288).

Unos momentinos, breves, esfrutando de les vistes y colamos pal siguiente finxu, el picu L'Arroz (1146) que se interpón ente nosotros y el Mayáu Cogullu (1085) onde tamos cabilando yantanos un bon bocadillu.

Col bandullu enllenu baxamos pela manzorga del ríu Pandu fasta algamar la formigona pista, con cuidadín nun emporcala deslizamonos seliquinamente pela afamá Ruta L'Alba.

Llegaos a Soto damos cuenta duna bona xarra de cerveza pa poer dar por finalizada esta pergüapa ruta.

01-11-2007 Remelende

PUERTU TARNA-REMELENDE-TABAYON DEL MONGAYU-TARNA

Trás salir de Xixón a les 8 de la mañana y parar na Pola Llaviana a ver los bartolos, que díficil ye probar solo unu; déxanos l'autobus no cimero del Puertu de Tarna (1490).

Salimos del autocar, unes semeyes, un ratín pa peinanos y ya nos ponemos a esguilar fastera arriba ensin parar hasta la picorota, el primer resoplíu y ya tamos nel Remelende (1889).

Ta al lláu, eso paecía, faise de rogar ¡pindiu ye! que bones vistes... güei somos un puñau meniskos.

Tras reagrupanos y camudar impresiones, que guapo, ¿desapaecera'l Uvieu? ponémonos en filera pa baxar a los Llanos d'Utra.

Unes parés bien verticales pala parte d'Asturies faen que vayamos más arrimaos de lo necesario a Lleón, seguimos caleyando p'algamar el picu Mongayu (1849) y el picu La Bardera (1872).

Baxamos ensin saber muy bien si tendremos que tornar a la cume, crestería alantre llegamos al Colláu La Rasa.

Agora tamos na zona conocía como L'Escalón, ta escabao na paré, ente la folla y la muga faen que se esnidie enforma, vamos chando mano de les escobes, unes vegaes ayúdennos otres, la mayoría fastidien más de lo necesario.

Llegamos ensin rasguños a La Campona (1160) ya oyemos el Tabayón, poco más alantre tamién lu güeyamos. Vamos pa él, crucíamos un regatu y xiramos a la drecha y p'atrás.

Casi nos metemos debaxo pa retratialu meyor, dende toles esquines, de toles maneres posibles. Hechase en falta un tripode, más lluz y sobremanera más paciencia.

Dalguna de regresu al camín siéntase nel suelu pa velu meyor.
De nuevu na Campona seguimos el camín p'abaxo pasando pel esfarraplau Mayáu Cabanielles (1205).

Crucíando el regueru na Requeixada, el camín ya pue nomase pista, vamos pel mediu'l Monte Saperu, intentando saca-y tolos colores a la seronda.

Pasamos per Terreos (1020) antes d'algamar el pueblu de Tarna (996), dafechu reconstruyíu tres la guerra civil, si nun fuera por esti datu naide xuraría qu'el chigre tuviera menos de 1000 años.