13-02-2008 Atambos

LA FELGUERINA-ATAMBOS-VISU LA GRANDE-CUERVU-LA FELGUERINA

Tras dexar el coche en Xixón, vamos con Victor hasta Pola Llaviana onde desayunamos bonamente, somos pocos, Victor, Montse, Jordi y Cundi los que nos aventuramos en busca d'un picu pa plantar el nuesu buzón de cumes, el primeru por agora.

Bien desayunaos colamos hasta La Felguerina (760), el día ta nídiu y fríu, apenes s'alcancen los 5º. Comencipiar y equivocase tolo mesmo, nel primer cruce como cabres tos p'arriba, yera p'abaxo, na fuerón 200 metros.

Tan formigonando la pista, fea costume agora que ya no queen ganaeros, coxemosla toa p'arriba, faise afanosa.

La ñeve que tamos pisando enseguía pasa a ser xelu, neses condiciones Jordi va dexandonos atrás, esperanos cola cámara retratar emboscáu nel colláu Vallegu (1500).
Ya ta menos pindio, llegamos a la collá La Canalina (1563).

El paisaxe ye acongoxante, picos y más picos que paecen imposibles de algamar, la ñeve dura, casi xelu fainos renunciar al primer finxu, el Berezosu. Con pies de plomo vamos rodíandolu pola manzorga.

Con cuidadín llegamos a la collá Atambos (1623) tase bien, bona compaña, buenes vistes, la temperatura agradable, pero llamanos el deber...

Empicotaos nel Atambos (1711) buenes vistes, notable altu, un firme candidatu.
Los tres que tenía como bonos collacios, ficieronme trampa, habíen subio sin les mochiles, agora daben la vuelta a por elles.

Victor, creeílo ye cierto, propon parase a xintar, negamonos en reondo y ponemos el güeyu nel siguiente oxetivu, el Visu la Grande (1708) d'aquí entamamos pal Collatín dela Xistra (1517) onde pa da-i gustu a Victor sentamonos a xintar.

Col pesu camudau deles mochiles a les barrigues el picu Cuervu (1582) paeznos una tachuelina insinificante. Baxamos pol Cantil arrancando les escobes coles pates.

Nel prestosu, porque taba buen día, mayáu Gallera (1250) damos cola pista, tamién tan formigonandola, col cementu frescu fue díficil no cayer na tentación de dexar la güella.

Mirabemos más p'atrás que p'alantre, güeyando'l picu que de xuru vamos adoutar como nuesu.

Ya na Felguerina, recibenos el mismu perrucu que nos había despedio pola mañana.
Ya camudaos tomamos la cervecina en Riosecu, d'aquí pa Xixón y pa casa.

Fue un día soleáu y de bona temperatura, caleyamos 17 km. 1300 m. de desnivel en 7 hores y media.

23-12-2007 Busllar

COLLA ARNICIU-BUSLLAR-PRIERES-GOBEZANES

Tras dir fasta Xixón a coyer l'autobus colamos pa Llaviana, na Pola desayunamos perbién. D'equí a la Collá Arniciu ye un momentín... Salir escopetaos del autocar y char el frenu de mano, los glayíos yeren pa facer la semeya la salía.

Fechos los deberes colamos a la manzorga, alcontríamos cabanes abondo, munches d'elles esfarraplaes pel suelu. Cuando el tarrén entama a ponese pindiu la xente entama a desperdigase, ¡y les conversaciones van apagandose!

Na Collá Busllar (1070) cada menisku busca el so camín, pa finar arrepegando peles piedres fasta empicotase nel cumal de La Busllar (1234). Un montón de semeyes dempués entamamos el descensu, a un llau dexamos el valle d'Orllé, al otru'l pantanu de Tañes.

Nuavamente na Collá Busllar tiramos a la manzorga, fasta'l Colláu La Trapa (1024) ente árgomes y munchos senderos algamamos una pista que nos dexa en Prieres (720) pergüapu y remozáu pueblu casín, entretenemonos sortiando una docena abundante de perros con toles tonalidaes posibles de lladrios.

Na segunda curva dexamos l'asfaltu pa garrar el Camín de la Peña, sortiando l'abismu llegamos a Gobezanes, bueno casi, impidionoslo el barro, la fame y la presencia de l'autobus abaxo na carretera.

Damos-y final a esta caminata de poques hores, 8 km. 318 m. p'arriba y 650 p'abaxo, el día nídiu, el cielu del Uvieu cerráu y una agradable temperatura.
La cosa complicase enforma, llegamos a xintar a La Carasca y recibenos un xentíu alborotáu, eso si con botelles de sidra na mano, y munches caxes vacíes nel suelu, nun dábemos a bastu a saludar.

En dando bona cuenta de la sidra, nun dexamos de facer lo mesmo cola fabada y el cabritu, metiendo a empuxones l'arroz con lleche. Finamos cola grandiosa presentación del nuesu buzón de cumes y el compromisu de dir toos a cincalu nuna cume entovía sin escoyer.

14-12-2007 Corbellusu

SOTO D'AGUES-MAYAU TRAPA-CORBELLUSU-ARROZ-MAYAU COGULLU-SOTO D'AGUES

Queamos a almorzar nel Berrón a les 8:30, Riestra, Miguel, Maite, Bernardo, Juan Carlos y Yo, empovinamonos pela autovía minera hasta dexar los coches nel amplísimu aparcamientu de Soto D'Agues (420).

En plenu parque natural, nun sabía qu'equival a parque de formigón, caleyamos pela aberrantemente remozada Ruta L'Alba... cuanto meyor cuando se conocía como les Foces del Llaímo.Meyor acondicionada que la mayor parte de les cais de les meyores ciudaes del mundu mundial, tonelaes de formigón nun espaciu que prohibe la presencia de cualesquier persona en gran parte del so espaciu.

Asina lu quieren conservar, trayendo autocares enllenos de turistes que nun soporten emporcase los zapatos.

Nosotros plantegamonos otres metes, mientrás nun deamos co la tiesta nos molinos de vientu...caleyaremos cola tiesta alta.

Nun paramos de caleyar, nun vamos parar d'escribir, en pasando les mines, a l'altor del Pontón de Retortoriu (500) xiramos a la drecha per una empiná pista, los goterones de sudor nun ayuden a fraguar el formigón.

Subimos pela Cuesta Pandu p'algamar el Colláu Trapa (950) guapu y afayaizu llugar con cabanes inda en bon estáu.

Baxamos separtando árgomes pela Foz del Corbellusu, dura poco está sensación, camudamosla enseguía pola de separtar cotoyes mentando esguilamos fasta empericotanos nel cumal del Corbellusu (1288).

Unos momentinos, breves, esfrutando de les vistes y colamos pal siguiente finxu, el picu L'Arroz (1146) que se interpón ente nosotros y el Mayáu Cogullu (1085) onde tamos cabilando yantanos un bon bocadillu.

Col bandullu enllenu baxamos pela manzorga del ríu Pandu fasta algamar la formigona pista, con cuidadín nun emporcala deslizamonos seliquinamente pela afamá Ruta L'Alba.

Llegaos a Soto damos cuenta duna bona xarra de cerveza pa poer dar por finalizada esta pergüapa ruta.

01-11-2007 Remelende

PUERTU TARNA-REMELENDE-TABAYON DEL MONGAYU-TARNA

Trás salir de Xixón a les 8 de la mañana y parar na Pola Llaviana a ver los bartolos, que díficil ye probar solo unu; déxanos l'autobus no cimero del Puertu de Tarna (1490).

Salimos del autocar, unes semeyes, un ratín pa peinanos y ya nos ponemos a esguilar fastera arriba ensin parar hasta la picorota, el primer resoplíu y ya tamos nel Remelende (1889).

Ta al lláu, eso paecía, faise de rogar ¡pindiu ye! que bones vistes... güei somos un puñau meniskos.

Tras reagrupanos y camudar impresiones, que guapo, ¿desapaecera'l Uvieu? ponémonos en filera pa baxar a los Llanos d'Utra.

Unes parés bien verticales pala parte d'Asturies faen que vayamos más arrimaos de lo necesario a Lleón, seguimos caleyando p'algamar el picu Mongayu (1849) y el picu La Bardera (1872).

Baxamos ensin saber muy bien si tendremos que tornar a la cume, crestería alantre llegamos al Colláu La Rasa.

Agora tamos na zona conocía como L'Escalón, ta escabao na paré, ente la folla y la muga faen que se esnidie enforma, vamos chando mano de les escobes, unes vegaes ayúdennos otres, la mayoría fastidien más de lo necesario.

Llegamos ensin rasguños a La Campona (1160) ya oyemos el Tabayón, poco más alantre tamién lu güeyamos. Vamos pa él, crucíamos un regatu y xiramos a la drecha y p'atrás.

Casi nos metemos debaxo pa retratialu meyor, dende toles esquines, de toles maneres posibles. Hechase en falta un tripode, más lluz y sobremanera más paciencia.

Dalguna de regresu al camín siéntase nel suelu pa velu meyor.
De nuevu na Campona seguimos el camín p'abaxo pasando pel esfarraplau Mayáu Cabanielles (1205).

Crucíando el regueru na Requeixada, el camín ya pue nomase pista, vamos pel mediu'l Monte Saperu, intentando saca-y tolos colores a la seronda.

Pasamos per Terreos (1020) antes d'algamar el pueblu de Tarna (996), dafechu reconstruyíu tres la guerra civil, si nun fuera por esti datu naide xuraría qu'el chigre tuviera menos de 1000 años.

17-10-2007 Carriá

BIDOSA-POMBAYON-BEYU-CANISQUESU-CARRIA-L'ARENAL-BIDOSA

Voy con Eduardo y Riestra, tras dexar el coche na Ponte Bidosa (294) comencipíamos a caleyar pela N. 625.

Si el Desfiladeru de los Beyos ya ye estrechu, agora vamos nosotros carretera abaxo faciendo que los coches tengan que maniobrar, crucíamos la Ponte Pombayón, dexando'l Ríu Sella debaxo y los coches a la drecha empobinamonos pal Beyu (400)

Mentanto'l corazón va recobriando la tranquilidá aprovechamos pa retratiar estos rincones. Horros ponguetos y la ilesia de San Inaciu.

Eduardo quéase ensin tarxeta, lo qu'antigüamente conocíase como retratiar ensin carrete.

Seguimos darreu direición Canisquesu (500) ya vamos integraos na ñatura; artos, ortigues y barro abondo.

Rebusquiando ente les ortigues damos col camín que pasa ente unes cuadres, tras cruciar un regato solo quéa llegar a lo cimero duna innnnterminaaaable campera.

Llegaos a la Collá Ortigosa (1020) recobramos el resuello, anque los güeyos nun atopen un llugar onde parase. Vamos pala manzorga, ya güeyamos el cumal.

Afayamonos nel Picu Carriá (1431), el día soleau, un poco calurosu pa facer estos esfuerzos, de sobra recompensaos poles vistes y los colores de la seronda.

Baxamos per una fastera bien pindia, la yerba alta y seca, per un llau un bon abismu pel otru un pergüapu monte de fayes.

Enseguía llegamos al Canalón de la Boa (1100) pel que pasamos pal otru valle, colamos pedreru alantre pa subir hasta'l Colláu'l Trechu (1193).

Agora baxamos pel estrechu valle hasta Arenes (630) y Vallesotu (550), un paisanu escrutina les sempiternes obres de la carretera a Viegu.

Tras entruganos nuesa procedencia, nárranos la mitá de so infancia y casi que toa so xuventú per estes tierres.

Dende L'Arenal (450) baxamos pel asfaltu sortiando camiones, grues, escavadores... y recoyendo tou'l polvu que saquen d'estes obres.

Asina que sedientos y polvorientos llegamos al coche aparcáu nel mismu chigre de Ponte Bidosa.