29-08-2009 Espigüete

VALVERDE DE LA SIERRA-ALTO DE LA CASILLA-ESPIGÜETE-COLLADO ARRA-VALVERDE DE LA SIERRA

Güei somos un rebañín, los nuevos llevennos cola llíngua fuera, dizlo el comandante y como siempre, tien razón, el próximu que quiera venir, por dicilo finamente tien que tener sobrepesu, muncho sobrepesu que haya qu'esperar guapamente por él.

Al golor d'un cafetín recién fechu y unes casadielles que entovía tan nel fornu vamos llegando a Campu Casu, Paco, Juan Luis, Riestra, Juan, Josito, Alberto, Bernardo, Manolo, Juan Carlos y Cundi, apenes son les 7.30 ta acabante d'alboriar.

En Valverde de la Sierra (1350) baxamos delos coches, el día despexáu atisbase calurosu, son les 9.30 cuando entamamos a caleyar, el gps quier llevanos enllano, ni putu casu al aparatu, pola pindia fastera p'arriba furando ente los piornos, eso si, pola solombra.

El Espigüete, la mole del Espigüete ca vez paez más grande.

Nel Alto la Casilla (1884) primera reunión téunica. Acabose la solombra. Les vistes empiecen a ser alloriantes, o acoxonantes según se mire p'abaxo o p'arriba.

Pol pedregal p'arriba dexa de ser pindio, agora ye cuesto, ya cuesta esguilando colos pies y les manes, faense necesaries les paraes, pa beber, pa mexar, pa descansar.

Llevanto la cabeza, nun pue ser tengo que axustar estes gafes, solo veo piedres y más piedres...y más piedres.
El calor secu desta tierra non fai sudar, menos mal porque calor fai de sobra.

Crucíome colos d'alantre, baxen del picu, van pal otru cogollu, faigo como que no los veo, solo tengo güeyos pala cume oficial.

Hay bastante xente, 8 o 10 de distintes procedencies, semeyes abondo, grandioses vistes, los macizos oriental y central bien delimitaos, van nomandose toles cumes d'alredor, los que se güeyen y los que non, dalgún noma hasta Sierra Nevada, güei pue dicise que'l calor yos afecta seriamente.

Son les dos, hora de xintar, facemoslo seliquinamente, la brisina fai afayaiza la estancia nesti Espigüete (2451).
Agora bien lo serio ¿por onde c... baxamos? murmuriando polo baxo, si viniera el helicoteru...

Tiramonos pol inmensu pedregal abaxo, caún baxa una tonelá de piedres y non se pue dicir que sean precioses, sobretó les que van dientro les botes.

Fináu'l pedreru toca remontar hasta'l colláu Arra (1993) como s'agradez el aire que sopla fríu, y sobre to'l güeyar el pueblu no fondero, ¡ya to p'abaxo!

Unes poques de piedres más, que non falte la porción de piornos y cotoyes, una fuente que ñaz nel mismu suelu, que fría ta non se dexa beber esti agua.

La pista llarga, tendía y polvoriosa dexanos nel mismu pueblu.

Bones fuentes que usamos de llavaderu, los coches na solombra, el club social que fai de bar a 10 metros, que guapo taba to.
Son les 5 dela tarde.

Paramos en Riosecu a refrescar otro poco, vamos con priesa, les obligaciones, Paco tien que dir a trabayar los demás a folgar.

Fuerón 1124 m. de desnivel, 12 km. en 7 hores y 40 minutos caleyando y 5 hores y 300 km. en coche.

23-05-2009 Peña Blanca

ALTU L'ORTIGUERU-TREBANDI-PEÑA BLANCA-ASIEGU

Güei vamos facer algo distinto, el plan ye finar xintando dempués duna visita cultural, esto en principíu tien que facer aumentar la familia.

Semos 35 los que a les 10.00 partimos de Xixón, na subía a L'Altu Ortigueru coincidimos cola clásica ciclista a Los Llagos, metémonos dientro la carrera, vamos alantrando ciclistes, notase que llevamos meyor motor.

Nel Altu L'Ortigueru (410) baxamonos del autobus y ponemonos a caleyar, llegamos al Colláu Cerraos (520) per una pista bien embarrá. La mayoría del grupu sigue de frente por onde más barro hay, les vistes seríen más prestoses si la borrina desapaeciera.

Pese a la borrina y l'orpín 11 meniskos van subiendo ente gorbizos pola pindia fastera. Llegamos al Picu Cantu (711), pasamos llista a ver quienes tamos, colamos cresta alantre gueyandonos de vez en cuando por di dalgún se esmolecía.

El sol sería muncho dicir, pero la borrina si que nos va dexando ver dalgunos metros más pallá de nueses narices.

Nel Colláu Trebandi topámonos col formigón, acompañanos hasta'l Mayáu Trebandi (797) onde falamos con dos pastores que tan atendiendo al ganao.
Seguimos darréu pol Mayáu La Mata, el Colláu Virzu y la Braña d'Asiegu (990) onde la xente parase a xintar.

Yo sigo los pasos de Jordi que lleva una guapa ventaxa, la falta de Josito cubrola yo, tiro de frente esguilando al primer cumal qu'atopo. Llego crestíando a Peña Blanca (1182) la más negra de tol Cuera, al mismu tiempu llega Victor y Jordi ya ta finando de xintar, danos envidía asina que entamamos la xintadera.

Baxamos intentando dir más apriesa que la borrina, misión imposible, atayonos y alantronos a la altura de la Braña d'Asiegu pela que pasamos a tientes, tengo a Jordi al lláu, selo porque vamos falando y a más de tar oyéndolu faigo-y casu.

Atisbamos el cercáu del Mayáu Trebandi, tiramonos en so direición, agora ye seguir la formigoná pista hasta dar col primer chigre.

La borrina va esmuciendose ya casi cuando nun fai falta, la diferencia cola última vegada que tuve per aquí ye'l mediu metro ñeve que falta.

N'Asiegu nun atopamos una fuente pa llavanos, dibemos enfotaos escontra'l restu del grupu, lo que ye lo mesmo qu'atopar el chigre, entovía dudío ente si taba rotu'l vasu o la botella, ta nidio que llevaba menos de lo que tenía que llevar.

Teníamos sede, pese a la borrina y l'orbayu matutín facía munchu bochornu.
Hasta agora van seis hores, 867 m. de desnivel y 13,4 km.

Tras abrevar per bien, col gargüelu bien frescu y camudaos de ropa, dalguna paecía dir de boda, comencipía la segunda parte desta xornada, un poco d'etnografía otro poco d'hestoria, peculiaridáes del quesu cabrales, visita a la cueva'l quesu...

Finamos cola tercera estaya del día, anque ya sea de nueche, una bona espicha con bon quesu, bona sidra, bona compaña, dalgún cantar y la vitoria del Sporting.
Y pa casa, llegamos pasaes la 1.00 de la mañana.

19-04-2009 Cuetu Santibanes

POLA VIEYA-CUETO-ENTEPENES

Queamos a les 8:30 en Xixón, hasta les 8:50 nun arrancamos, en Cabanaquinta más de media hora pal café.

Descontrol asolutu pa llegar a la Pola, otra media hora pa entamar la caminata.

Amás hai que ponese pala dichosa semeya de la salía... comencipíen los repechos, el voceriu va queando atrás.

Vamos a la vera'l ríu, baxa más agua pel camín, un paisanu diznos que ñevo anueche.

Ya ye raru'l día qu'esti iviernu nun ñeva.
Al Coto la Pola llegamos bien estiraos, cansau d'esperar tiro detrás de Josito.

Nes Champes esperamos bonamente, los que nun quieren, o nun pueden subir al cumal tiren pista alantre.

Esguilamos pente la ñeve hasta'l collau Fierros (1432), pergüapes vistes, p'alantre el conceyu de Casu, la Cruz de los Rios onde fina la desprestixá Ruta l'Alba, p'atras el conceyu d'Ayer...

Ca vez más ñeve, finamos empericotaos en Cueto (1646) mal nomau picu Cuchu, si lo sabré yo que tola vida oyi "vamos pa Cueto", coincidimos con dos montañeros que tan col concursu de la Fempa.

Vuelvo a atalantame con Carlos y Josito, aprovechamos les güelges de los concursantes, agora hai más de mediu metro de ñeve.

Arrivamos a la Vega Rueses, facemos piña colos collacios que nun quixeron emporcar la ñeve.

Más duna hora esperando y nun apaez naide, ye cuanto menos preocupante.

Siguimos un trocín p'abaxo, en Barreo (1250) vuelta a la espera, otru ratu bien pergrande.

Cola preocupación de que tuviese pasao daqué, decidios a salir escontra d'ellos cuando apaecen riendose.
Vuelta a derrapar y pasando per detrás de les Olenges baxamos pela pista hasta Entepenes (550) na mesma carretera.

Enantes chamos una bona parolada con un paisano, llegamos a la ermita de San Xulián y al ríu del mismu nome, que va tiempu pretendíen embalsamar, en que tare pensando, embalsar, facer un pantanu, progresu, el progresu redios.

Col agua casi xelu llavámonos bonamente, lleguen los de los coches y ya nos podemos camudar, un día muy raru... ye'l mio paecer.

Paramos en Mieres, dempués dunes botelles de sidra ya se ve too d'otra manera.

Nun ratiquín, unes 7 hores anque poques en movimientu, ficimos 14,7 km. y 1133 metros de desnivel