19-04-2009 Cuetu Santibanes

POLA VIEYA-CUETO-ENTEPENES

Queamos a les 8:30 en Xixón, hasta les 8:50 nun arrancamos, en Cabanaquinta más de media hora pal café.

Descontrol asolutu pa llegar a la Pola, otra media hora pa entamar la caminata.

Amás hai que ponese pala dichosa semeya de la salía... comencipíen los repechos, el voceriu va queando atrás.

Vamos a la vera'l ríu, baxa más agua pel camín, un paisanu diznos que ñevo anueche.

Ya ye raru'l día qu'esti iviernu nun ñeva.
Al Coto la Pola llegamos bien estiraos, cansau d'esperar tiro detrás de Josito.

Nes Champes esperamos bonamente, los que nun quieren, o nun pueden subir al cumal tiren pista alantre.

Esguilamos pente la ñeve hasta'l collau Fierros (1432), pergüapes vistes, p'alantre el conceyu de Casu, la Cruz de los Rios onde fina la desprestixá Ruta l'Alba, p'atras el conceyu d'Ayer...

Ca vez más ñeve, finamos empericotaos en Cueto (1646) mal nomau picu Cuchu, si lo sabré yo que tola vida oyi "vamos pa Cueto", coincidimos con dos montañeros que tan col concursu de la Fempa.

Vuelvo a atalantame con Carlos y Josito, aprovechamos les güelges de los concursantes, agora hai más de mediu metro de ñeve.

Arrivamos a la Vega Rueses, facemos piña colos collacios que nun quixeron emporcar la ñeve.

Más duna hora esperando y nun apaez naide, ye cuanto menos preocupante.

Siguimos un trocín p'abaxo, en Barreo (1250) vuelta a la espera, otru ratu bien pergrande.

Cola preocupación de que tuviese pasao daqué, decidios a salir escontra d'ellos cuando apaecen riendose.
Vuelta a derrapar y pasando per detrás de les Olenges baxamos pela pista hasta Entepenes (550) na mesma carretera.

Enantes chamos una bona parolada con un paisano, llegamos a la ermita de San Xulián y al ríu del mismu nome, que va tiempu pretendíen embalsamar, en que tare pensando, embalsar, facer un pantanu, progresu, el progresu redios.

Col agua casi xelu llavámonos bonamente, lleguen los de los coches y ya nos podemos camudar, un día muy raru... ye'l mio paecer.

Paramos en Mieres, dempués dunes botelles de sidra ya se ve too d'otra manera.

Nun ratiquín, unes 7 hores anque poques en movimientu, ficimos 14,7 km. y 1133 metros de desnivel

31-3-2009 Peña Salón

PUENTE GÜERA-VIBULI-PASA'L TOYU-PEÑA SALON-CASIELLES- LA CAVIELLA-PUENTE VERGANZA-PUENTE GÜERA

Vamos camín de Villaviciosa onde Paco, Angel y Yo tenemos que xuntanos con Bernardo, Manolo y Juan Carlos que vienen dende Uvieu, y como si de la alianza de les civilizaciones se tratara tamién colos de Xixón, Eduardo, Emilio y Riestra.

El cielu ponse ca vez más negru, llueve con gracia, poca, muy poca, pero gracia'l fin.

Dexamos los coches en Puente Güera (320), nun hai sitiu pa más, ponemos los chubasqueros pa quitalos poco dempués.

Subimos pela carretera la estrecha foz de los Andamios, tamos vixilaos por bandaes d'utres que tan apostaos nos murallones calizos que apenes nos dexen ver les ñubes. Tamos como toros, como ten esperando que cayamos derrotaos... muerren de fame.

Poco más palantre damos col enigma, Emilio saltando encina una cabra, teníase despeñao, Emilio solo quería los cuernos, con ellos na mano el restu l'animal queáse palos utres.

Enantes d'arrivar a Vibuli (760) ponse a granizar, apenes son les 10, menudu día nos espera.

Chamos un buen ratu de parola con un paisanu, ente semeya y semeya, ente anécdota y anécdota va apurriendonos datos de tiempos pasaos.

Magar coyer agua siguimos caleyando, too p'arriba, pente la ñeve recien desta nueche. Abriose'l cielu, aprieta llorienzu.

Algamamos el colláu Baxeñu (1034). Pal aire y el fríu guantes, gorru y forru polar, nin na pasarela Cibeles se camuden tan apriesa.

Tenemos el cumal frente a nos, vamos facelu de rabiar, soslayámoslu, pasamos mirándolu de refilón, baxamos un puquiñín y atopamos un furaquín na pareona.

Una cuevina con escalones y too, ye la Pasa'l Toyu (1050), agora alcontrámonos na otra fastera.

Pela biesca y con más ñeve ainda algamamos el buzón, Peña Salón (1245) reza'l cartelu.

Paez que toos tengamos catarates, vemos una telina blancuca qu'estropia'l paisaxe. Unes poques de semeyes y colamos, nun tá na afayaizu esti picu.

Pasamos pela Boya Campiella (1194) pa pel camín del Llaciu dar en Casielles (820). A la vera la capiya sentámonos a xintar, bon vino de Madri nos traxo l'andariegu.

Darreu coyemos la sienda'l carteru, paramos nel abandonáu y casique derruidu pueblin de La Caviella, too p'abaxo hasta'l ríu Sella, vémoslu no fondero encaxonáu nel desfiladeru de los Beyos.

Güeyamos los coches, tras cruciar el puente Verganza llegamos a l'asfaltu, tras un kilometru pela N-625 llegamos a los coches.

Tan en Puente Güeria esperándonos con bona educación, mentanto refrescamos el gargüelu acordamos tiranos al monte el próximu llunes.
Güei fuerón 15 km. y 1000 metros de desnivel en poco más de 6 hores.

13-02-2009 Turvina

RUENES-CABEZA DESNA-TEYEU-TURVINA-ARANGAS

Pasen a buscame Bernardo, Juan Carlos y Manolo, en Villaviciosa xuntámonos con Paco, Emilio, Riestra y Eduardo, tras el cafetín y la merca del pan colamos pa Ruenes (300) na Peñamellera Alta.

Falamos colos paisanos del llugar, tan asoleyándose, vamos tener un buen día dicennos, será'l primeru en va munchu tiempu.

Ya son les 11:30 cuando entamamos a caleyar, el desnivel ye perbonu, les goterones de sudu dexen permoyáu el camín carreteru, que fina a la vera dunos xigantes molinos, a non... son torres d'alta tensión, damos col senderu que se retuerce, tantes vueltes y revueltes anque lu faigan más llevaderu, sicoloxicamente a mi siéntame permal.

Dexamos de soslayu les Mines de Cerezu (600) deles qu'extrayíen l'almagre (mineral ferroginosu), les maromes d'aceru desperdigaes pel suelu faennos imaxinar el trabayu que costaba ganar unes perruques.

Na braña La H.orada (1050) na vega asina nomá comencipíamos a pisar ñeve, les vistes son ablucantes, l'Urriellu casi a un saltu y si saltes pal otru lláu un buen coscorrón na vera'l Cantábricu.

Paramos apenes pa reponer el resuellu, a la drecha dexamos el cumal del H.aba, l'últimu finxu de l'anterior vegada per estos andurriales de la Sierra del Cuera.

Güei xiramos a la manzorga, camín del Cabezu Desna (1226) nun santiamén tamos allá arribona empericotaos, tras les semeyes de costume baxamos con cuidau onde asitiar los pies... que terrén tan malu y... ñevau.

Agora toca-y al Picu Teyeu (1220) y d'aqui, soslayando los ñeveros y los h.ous, pal Turvina, metímonos en toos, eso me paez. ¡y nun yeren pocos!

Ensin rastru de les ñubes, los Picos ñevaos y el Cantábricu como un platu, enpericotaos nel Turvina (1316) con sos dos picachos, d'uno a otru y vuelta a empezar.
La curiosa escultura y les ablucantes güeyaes...

La sensación de tar colos picos a la espalda cuna ñeva d'órdagu, y la playa de frente con l'ablucante día de sol, nun atopo pallabres, atopamos les fuercíes pa colar, la siguiente estación el mayau Piedra l'Osu (1080).

Cola espalda na muria duna cabana, los bocadiellos bien asitiaos nes manes, y la bota col vino de la manchega cosecha de Paco como lloca de mano en mano y les oveyes xaldes siguen paciendo ensin inmutase ante la visita de tantes y tan importantes personalidaes.

Siguiendo'l cercau a la drecha hasta dar cola portiella que da pasu a la Canal del Gobiu, llargu y pronunciau descensu pasando pela fuente Devaniegu. A les 18:00 tamos nes Arangues (355) a la vera'l texu y la consiguiente ilesia, primero son los dioses primeros.

Mentanto refrescamos el gargüelu, resecu pol soleau anque non calurosu día, llamamos a un taxi pa dir hasta los coches, curiosu dialogu, un guah.e entruga-y a la bisgüela, ¿cuantos años tienes? 98 ¿y tu? yo 5, ¿entonces cuántos te saco? ¡99! nun se cuál de los dos cuerre más.

Ensin más pa casina, una ducha y a trabayar, xusto, muy xustu de tiempu. Fuerón 7 hores caleyando pa facer 15 km. y 1270 m. de desnivel.